Mittichu Chaynu qansicha ikkinohu baatto loosi`re galino manchi noonka. Mitto barra Farashshu ba’’annosi. Hakko barra olluu manni baalu jawaachishasira minisi geeshsha mare “Farashshikki bainota macciishshinummowe; hige kuni lowontanni mararsannoreeti” yitannosi. Baatto loosi`re galino manchino “Ikkara dandaanno!” yee qolannonsa.
Laynki barra hakku bai yini Farashshi wole lamala dubbu giddo heedhanno Faradda haa`re minira higanno. Konne coye macciishshihu olluu manni xaano daannoti “Hashshu ballo! Kunni ka`a settu Faradi anna ikkito yaate! Ati isi mageeshsha kaayyaataamo manchooti?! yaannosi. Baatto loosi`re galinohu kayinni xaano dawarosi “Ikkara dandaanno!” yitannote.
Aantete barra baatto loosi`re galino manchi ilino beetti mitto dubbu Farashsho qajeelsa hasi`re badhete aana gidde gulufanna hakko Farashshi uullate aana tugeennasi beettu uwe lekka hiiqqi`ranno. Olluu mannino rosinonte gede baatto loosi`re
galino manchiwa mare “bushu coy mayra xaadihekka; qaaqqikki lekka hiiqqamasi lowo geeshsha mararsitanno!” yaannosi. Xaano baatto loosi`re galino manchiti dawaro “Ikkara dandaanno” yitannota ikkitu.
Laynki barra olaho manna filtannori gargarooshshu mokkonninooti ollaansa dagge baatto loosi`re galino manchiha beetto agurte wolootunnita ooso borreessite hadhanno. Xaano hakkuri olliisi mannooti dagge “Kuneeti beettikki lekka hiiqqamino daafira olaho filamikkinni gatino. Ati kaayyaataamo manchooti!” yitusi. Baatto loosireemmehu dawaro kayinni xaano “Ikkara dandaanno” yitannotenka.
Tenne dhaggenni adha hasiissannonketi umi sokka kalaqamu harinsho, lowontanni sarraaqantinotanna mimmitisewa amadisiisantino harinsho ikkitinotanna hatte harinsho giddo kalaqamannohu hiikku coyno dancha ikko busha badate halaalintanni dandiinannikki coye ikkinotaati.
Batinye yanna mitto tunceessa woy xaadannonke coye gimbeemmoha ikkiro busha, banxummoha ikkiro kayinni dancha ikkino gede assine adhineemmo. Kayinni bushu coyi danchu coy nookkiha woy bushu coy danchu coy nookkiha hee`rara didandaanno. Heeshshonke giddo danchano ikko busha ikkino coy kalaqamiro, hakko tunceessi albillicho may dani guma woy qarra abbara dandaannoro horontanni dianfoommo.
Abbebech Maatewoos
Bakkalcho Dotteessa 27, 2014 M.D
