“Fichee cambalaalla mittimm ankera” yaanno massagote qaalinni 5km qolchanshote heewo Sidaamu qoqqowinna Hawaasi quchumi jajjabba loosu massagaano afantinowa harinsoonni.
Barru wosinchi Sidaamu qoqqowi layinki pirezidaantichinna rosu biiro sooreessi kalaa Beyyene Baraasihu; sa’u lame dirrara fichee cambalaallate ayyaani koroonu fayya korkaatinni ayirrisamikkinni keeshshinota kayise; Tayixe dirinni iibbadu garinni ayirrisate qoqqowu mootimma ikkado qixaawo assitinnota xawisino.
Qoqqowu Ispoortete komishiine komishinerchi Firew Areerihu, Fichee cambalaallate ayyaani lamala lainohunni babbaxxitinota Ispoortete millimmo assinanni keeshshinoonnita kayse; Mas ispoorte/gutu/Ispoorte, lekkate kuwaasenna qolchanshote heewo qarunni kullannire ikkansa coyi’rino.
Lamunku gashshootsooreeyye sayisino sokkanni, fichee cambalaallate ayyaana baxillunninna mittimmatenni ayirrinse sa”ate qoqqowu daga risaminoha wosincho adhatenna manna ayirrisate bude leellishshanno gede huwachishinno.
Heewote meentunna labballunni 1-3 geeshsha fultino heewisamaanora Hawaasi quchumi gashshooti meedaaliyu baraarsha uynonsa.
Bakkalcho Dotteessa 20, 2014 M.D Hamuse 2
