Tayxeha Sidaamu daga haaro diru soorro Fichee Cambalaallate ayyaana techo Dotteessa 20-21/2014M.D geeshsha ayirrinsanni.
Haaro diru soorro ayyaana lainohunni xawishsha uynohu Sidaamu dagoomu qoqqowi pirezidaantichi kalaa Desta Ledamohu; hawalle keere iillishi’ne yaatenni, Sidaamu daganna mootimma hasiissanno ayyaanu qixxaawo assitinota xawisino.
Kalaa Desta sokkasinni, konne ayirrado ayyaana daga timbiliqqe fulte ayirrissanno gede woshshatto assino.
Fichee Cambalaallate ayyaani akkalu dirinni haaro diro sa’nanni ayyaana ikkasinni giwantinori araarantannore; babbaxxitinori xaaddannonna keeru dirranno ayyaanaati yaatenni; mimmito kaa’lama luphi yite leeltanno; baalunku mine minesi hagiidhe ayirrisannonna jawa shiima yiniikkinni baalunku mittimmatenni ayirrisa nno ayyaana ikkasino qummeessino.
Ayyaanu giwantinori araarantannoha ikkasinni mittuno ga’labbote qarri hee’rannokki daafira kalqoomu Fichee- Cambalaalla ninke ledo dagge ayirrisso yaannino sokkasi saysino.
Tayxee Fichee Cambalaalla ayirrinsannihu qoqqowo ikkine uminke umonke massaga hananfoommo yannara ikkasinni ayyaanu jawa macciishshammenni, danchu garinni sooreessu gudumaalira hagiirrunni ayirrinsanniha ikkinota coyi’rino.
Fichee Cambalaallate ayyaani UNESCO te borreessaminoha ikkasinni Itophiyu qaru quchumira Addis Ababahono sufe ayirrisamannota lede xawisino.
Tayxe ayirrinsanni ayyaanira jajjabbu ministirootinna qoqqowubbate pirezidaantooti mitteenni ayirrissannotano xawisino.
YAAREED GEETACHEW
Bakkalcho Dotteessa 20 , 2014 M.D
