Ispoortetenni gummaamma ikkate qaaqquulle kaima assine loosa hasiissannoti xawoho. Itophiyu Lekkate kowaase Federeshiine dironsa 15 woro ikkitinore lophitanni noore paayletete pirojektenni hanqafatenni gobba riqibbanno dorantino lekkate kowaase godo`laano laashshate loonsanni leellinanni. Pirojekte Tigirayete Qoqqowo callu gatanna 27 gobbate qooxeessira loonsanni hee`nonniha ikkanna, lamente ko/teenni 810 lophitanni no qaaquulli qajeeltanni afantanno.
Konne harunse, Federeeshiinete Pirezidaantichi Kalaa Isaayyaasi Jirihu pirojektubba noo qooxeessubbara leellatenni towaanyo asse qajeelshaho kaa`lanno uduunne irkisino. Qajeelshu Hanafi yanninni kayse noo deerri maa lawanno yannoha la”ate dandiinohu Pirezidaanctichu, qaaqquullu pirojekte albillicho hexxo assinannita ikkitinota Federeeshinete dire-getsetenni afi`noommo mashalaqqe xawissanno.
Xaanni hexxo leellishshanni hadhanni noori lophitanni noo qaaqquulli mereero 17 diri wori gobboomu gaamo miilla ikkate dandiitinori nootano qummi assino. Wolootu kayinni quchummansara noo godo`le giddo e`e beeqqano ikkitanni no. Xaphoomunni pirojekte noo deerra keenate dandisiissanno heewo tekiniikete komite fushshitanno pirogiraame kaima assine Maaja agani giddo hananfanniha ikkanno.
Konni albaanni addi addi ispoorte labbanno pirojekte uurritanno yannara balanxe assinanni qixxaawo ajjinota ikkitinohura, gumaame ikkitukkinni gattinota anfoonni. Federeshiine konne qarra tira dandaate ispoortete dhuki noonsa qooxeessa bandeenna konne qeecha fultanno gede qoqqowubbate uynoonni. Konni gedensaanni Federeshiinete tekiniikete komite beeqqitino doorsha assatenni qajeelshu mereershi uurrisa dandiinoonni. Qajeelshuno Fiifunna Kaafu ogeeyyenni qajeeltino qajeelaanonni uynanni hee`noonnita pirezidaantichu qummi assino.
Godo`linanni kowaasenna qajeelshu uduunni ledo amadaminohunni, Federeeshine “Mitte kowaase mitu qajeelaanchira” yaanno umini garunni wo`ma qajeelsha afidhanno gede assate loonsanni hee`noonni yiino. Ikkinohura, mitto kume isilanchimmase agadhitino kowaase Moozaambikete hirranni gede assine mittu mittu qajeelaanchi mitte kowaase afidhanno gede loonsanni hee`noonni.
Woloota qajeelshu uduunni daniinnina dhukinni iillado aassate wo`naalanni hee`nonni. Pirezidaantichu, “Qajeelaano loosu giddora e`u woyte baaluri wo`mino garinni dikkino” yiino. Konni kaiminni, konni albaanni, qajeelshu qodho shiqishino; xa kayinni godo`linanni kowaase wonshinanni hee`noonnita dire-getsete nabbawisino.
Ikkirono, mitu mitu qooxeessi aana xaano anfi gede assine isipoortete horoonsi`nanni xawi aana qarru leellanno. Konnira, qoqqowubbate ispoortete biironna quchumu gashshooti massagaano ledo hasaawatenni kuni qarri tidhamanno gede assate looso loonsanni hee`noonni.
Haammatu qooxeessi aana ikkadu xawi no; ikkollana, hajanjannihu wolu bissanni ikkinohura lophitanni noo qaaqquullira qajeelsha injeessate guficho ikkino. Ikkinohura, horoonsi`rate pirogiraame fushshinanni gede hasaawa assinoonni. Godo`linanni baychinni roore qajeelaano hunkeessa riqiwate hasiissannonsare afidhanno gede Federeeshine qoqqowunna quchumu gashshooti ledo hasaabbe qaale e`ino. Annuwano qaaquullu rosu aana illachishanno gede assitanni heedhe, qajeelshu wiinni dagganno woyteno ittannore garunni shiqishate loosa noonsa yiino.
Federeeshiine uurrissino pirojektenni roorennka mitu mitu qooxeessira uminsa kakkaooshshinni 17 diri woro ikkanore qajeelshatenni hexxo assinanni qajeelsha uynanna laino. Tini pirojekte nootano pirezidaantichu xawisino. Konne irkisa hasiissannohura qajeelshu uduunne irko assate qoleno pirojektete Federeshiinete biso ikkitanno gede assinoonnita kulino.
Tini Pirojekte yannate geeshsha calla ikkikkinni hegersine lonsannitano egensiisino. Konnira 4 diro qajeelshu aana keeshshitino wedelli gobboomu gaamora irko ikkitinohura, gobbatenna afirikaho hattono kalqete deerrinni qixxeessinanni godo`lera beeqqaano ikkkitannota xawisino. Lophitanni noo ooso aana loosa federeeshinete looso calla ikkikkinni wolootuno la`annonsa bissa halante loosa noonsata kulino. Lophitanni noo wedelli lekkate kowaase latishshi qinaawinoha ikkanno gede assate, baalunku mitimatenni uurra hasiisanno yiino Pirezidaantichu.
Abrahaam Saamueel
Bakkalcho Dotteessa 13 , 2014 M.D
