Bakkaayyenna Waachamo mittu olliira heedhanno. Lamunku 6ki kifile rosaanooti. Bakkaayye rosoho addintanni jawaataho. Waachamo kayinni rosu minira ganye didaanno; rosohono hakkeenshshaantilla. Konnira mimmitu ledo addi addire lainohunni hasaabbanni rosu minira hadhanni hasaabbanni no:-
Bakkaayye: Keere galitto Waache?
Waachamo: keereholla
Bakkaayye: Tenneetinku rosu minira mayra daa hoogitto?
Waachamo: Anni`yara luu`lo mooraano guddanna mitteenni xinqinanna keeshshoommo.
Waachamo: Wo`naalshuwa, fonqolantinoonnini?
Bakkaayye: Be’ro Sidaamu afii rosi wo`naalsha adhinoommo.
Waachamo: Su`ma woshshitinoyya? Yee xa`manno duucha woyte seejjitannosihura rosiisaancho waajje.
Bakkaayye: Ee woshshite hadhino!
Waachamo: Coye waahinohura agure higara yore techo hanqitannoena ma”assokka? Yiisi.
Bakkaayye: Dihanqitannohena kai!
Waachamo: Maahoyyena kaixa yii wodanisi gati yaanna, nookkitenni mimmito amadde hadhu.
Rosu mine rosiisaanchosi danbaare Su`ma woshshite ka`e Waachamo annasi woy amasi abbanno gede dhaansa sokkanno.
Waachamo: Giiraminohu Bakkaayyera hashaashe kulanni; afi`ranni hee`reennanna ati assiteennaeeti. Su`ma woshshite ka`eenna eoommoro tini no?
Rosiisaancho: Ilino`ne ayidde abbe yuumma`ne rosaano ga`a insa haadhine daa hoogginiro ki`neno dagginoonte! yite hanqitinoti mite kifiletenni fulte hadhu.
Lamunku fooliishsho fultinowa hasaawa hanaffu.
Waachamo: Anni`ya albaannino daynohura maahoyye yee didaannoe yaannosi yaadinohu mitu annaho mare kuliro qaete anna mooranni hosanno barruwa afantannohura.
B a k k a a y y e : H a k k e e s h s h a digiwannohena kulisilla!
Waachamo: Bakkaayye! umo dhiwanni nooena ha`reemmo. Anni`yano daannoeha dilawinno`ena borreessidhinire atewiinni galchi`reemmona!
Bakkaayye: Gattino pireede gundeenna diha`ratto?
Waachamo: Agurie didandoommona ha`reemmolla!
Bakkaayye: Maahoyye woyya assohena soodo annakki haadhe amoxa! yiisi jaalisi ikkitosi dogannita ikkitinota afe hee`renni.
Minira maranno woyte annisi Waare; ooso fultukki mayra dayitto? Yee xa`misi hanqinohu mitu bae daynohura buna gudara ikkinota wodannunni hedanni.
Waachamo: Umono dhiwinoe; rosiisaanchonkeno ilino`ne ayidde abbe yiteenna agure dayoommo! yee kulisi kaphinota kayinni albisi kulanni no. Ilino`ne ayidde mayra abbe yitinohe? yee annisi xa`misi. Isino qolannoti dikultinonkena abbella yitino yiisi. Dogannota egensiisi`ranno. Annuno maahoyyena konne buna daammu eela masse dayeemmona qaete agariexa, giwihero akimete minira ha`rattona yiisi hanqinohu rosinonte gede gate mare buna gudannota wodanisi kulannasi. Annu fulanni hee`reenna Waachamo ogoro adhe gate buna xinqi`re hirara huxxa luuxe fule lekkate doogo maaxame qorraho ha`ranna hedeweelcho annu buna muleenni hire higanna tunchu yitanno. Xooqara hakka kawa higannowa hooge uurrinowa hunkuu way gede lolahe iimisinni dirranna annu amade mamira hadhanni nootto? Hakku angakkihu maati? yee xa`mannosi mitte anganni iso mitte anganni ogoro qalxe amade mitteege qawaadanno. Waachamono anna`ya bushiishoommona shitootie! yiino.
Abbebech Maatewoos
Bakkalcho Dotteessa 6, 2014 M.D
