Ayirrisamatenna kaa’lamate ayyaaninni gobbate mittimmara, keerehonna latishshaho wo’manti daga qixxaabbanno gede Itophiyu Isliminnu hajubba xaphoomu amaale mini pirezdaante Haji Mufti Umer Idriisi huwachishi.
Addis abebu quchumira baxxino garinni Id Alfexiri qoorre gumulo doogimaru Ifxaari qixxaawo harinsi yannara, Haji Mufti Umer Idrisi; ayirrisamatenna kaa’lamate ayyaaninni gobbate mittimmara wo’manti daga qixxaabbanno gede woshshatto assino.
‘’Gobbanke keere ikkito; gobbate mittimma oonke’’ yee; latishshu handaarinni gobbanke gotti yite leeltanno gede noosi halcho xawisino.
Bayiruuddenke ayirrinseemmo gede, maa’nuulleno mararreemmo gede eeggote sokka sayisinoha ikkanna ; aaninoh gobboomu doorsha keeru doogonni gumula hasiissannota huwachishino.
Addis abebu quchumira harinsoonniti doogimaroho hurbaaxxate qixxaawo konni alba harinse egenninoonnikkita dancha qixxaawo ikkase kayisinohu Haji Mufti; dagatenna gobboomu qixxaawo ikkasenni tenne qixxaawo qixxeessitino bissaranna fajjo uyino quchumu gashshooti massagaanora; qixxaawo keerunni hanafante gumulanta geeshsha loossanni keeshshitino adawu bissara Isliminnu amma’no harunsaano su’minni galata shiqishinno.
Layinki kantiibi ba’lattonni owaante uytanno uurrinshuwa qineessaanchi kalaa Zhaanxiraara Abbayihu isi widoonni; gobbanke Itophiyunna quchuminke Addis Ababu babbaxxitino daganna amma’no afantannowa ikkansanni shotunni giira qasa dandiinanni yite heddannori heedhurono; hedonsa wo’mitannokki gede kayinni amma’note annuwinke leellishshinonkena konni loosinsara galatu hasiisannonsata xawisino.
Doogimaru hurabaatu amanyooti beeqqaano ikkitinori mite mite amma’note harunsaano uytino hedonni;Itophiya billaallisate dagganno hunaanora Islaamu dagara dargu nookkita kulte, aanteteno mittimmanna baxille lossitanno hajubba aana beeqqatenni gobbate keerenna mittimma agarsiisa hasiissannonke yitinno.
Addis abebu quchumira harinsoonni 15 kumi ali daga beeqqitino doogimaru hurbaati amanyooti aana Islaamu daga gobbanke agaraanooti; haaroo’mate kofatto mittimmanke xawishshaati; noonke gobba mitto Itophiyaati agarremmose yitannota qara hedo macciishshiishshino.
Jeefoteno 1442ki ID Alfexiri ayyaanira hawalle keere iillishi’ne yee; keerunna baxillu hattono mittimmanna elto duuchunkura ikkito yaanni halchosi xawisino.
Qiddist Gezaheny
