Abrahaam Saamueel
Hawaasa:- Hawaasi Quchumi Lekkate Kowaase kilawe xintantunkunni seeda diro kiirsiisino jawaata kilaweeti. Itophiyu Betking Itophiyu Pirimiyeerete Liige dhaggenni duucha yannara danchu su`minni woshshantanni keeshshitino kaajjado kilaweeti. Sa`uta seeda dirra pirimiyeerete liige heewora jawaata guma borreessiisanni keeshshitinoti tini Kilawe, lame higge Itophiyu Pirimeere liige boowe kaaysano dandiitino.
Tini seedu diri dhagge nooti Hawaasi Quchumi Lekkate Kowaase Kilawe, tayxehano 2014 M.Diri BetkingItophiyu Pirimiyeere liigete heewora jawaatte heewisantanni noo kilawe ikkasenni, konne diro noose millimillo lainohunni Hawaasi Quchumi Ispoortete kilawe Qara Loosu Harisaancho Ikkinohu Kalaa Utteessa Uggamohu ledo hasaawa assinoomo.
Hawaasi Quchumi Lekkate kowaase Kilawehu Qaru Loosu Harisaanchi Kalaa Utteessi Uggamohu Bakkalcho gaazeexi ledo assino hasaawinni xawisinonte gede, Hawaasi Quchumi Lekkate kowaase kilawe 1976 M.Dirinni kayse xaa geeshsha noohu gumise qoqqowoho noo kilabbanni luphi yiinoha ikkinota xawise, betking-Itophiyu Pirimeerete liige heewora doychotenna tuge sa”ate godo`lera boowe kaaysa dandiitino kilawe ikkitinota kulino.
Sa`iha boode diro hasi`noonni guma abbate aana foonqe nooha ikkirono, ajino guma kayinni borreessiisse diegentino.
2014 M.Diri betking-Itophiyu Pirimeere Liigete heeworano kilawe alba nooseta foonqe beeshshatenni dancha guma abbate mixo amande loosu giddora e`ni gedensaanni, tenne yannara kilawe jawaata heewisamaancho ikkite suffanni no.
Pirimeerete liigete godo`lera e`ara albaanni kaajjado millimillo assitanno gede assinihu gedensaanni dhaaddote godo`le widira e`inota Qaru Loosu Harisaanchi xawisino.
“Hawaasa assinoonni Beetikinge Itophiyu Pirimeerete Liige heewora jawaattenna kaajjite heewisantinota kulinohu Kalaa Utteessi, hasi`noonni guma kayinni abbate didandiitino” yiino.
Kalaa Utteessi xawishshi garinni, Hawaasi Quchumi giddo harinsi heewo yannara nooha kaajjadonna laafa midaado bandihu gedensaani, Dire-Daawu Quchumira heedhanno heewora jawaatte heewisante dancha guma abbitanno gede faasho worre heewote giddora e`noonnita buuxisino.
Dire-Daawu Quchumira 6 hinge harinsoonni heewora Kilawenke mitte godo`lera calla qeelante 4 qeelte, 1 godo`lera taalo fulte Dire dawaaho noo godo`lera 3ki deerra amadde jeeffisa dandiitinota Loosu Harisaanchi Utteessi coy`rino.
Fooliishshote yanna gedensaanni Beetikinge Itophiyu Pirimeere Liige heewo Adaamu Quchumira harinsanni hee`noonni.
Xaano Quchuminniti Lekkate kowaase Kilawe Adaamaho noo heewora Jimma Abbajifaari kilawe ledo xaadde 2:0 qeelatenni godo`le danchu guminni hanaffinota qummi assino.
Tenne yannara tini Kilawe heewo massaganni noo Qiduusi Giyoorgisi kilawenni shoole bixxillenni Wolayta Dichunni mitte bixxillinni calla woroo higge 3ki deerra amadde Dire daawaho harinsanni hee`noonni heeewora heewisantanni leeltanno.
Tayxe diro kilawenke boowe kaaysate amandoommo mixo gumaame assate kaajjine loonsanni hee`noonnita kulinohu Qaru Loosu harisaanchi, qajeelshaanchuno tini mixo gumu aana hossanno gede addi addi tekiniike horoonsi`re jawaate loosanni noota xawisino.
“Quchuminniti Lekkate kowaase kilawe aja dume gambooshshinni safantinohura xa noo guma abbate dandiitinota kulinohu kalaa Utteessi, konne kaajjinshe sufisate woroonni wedella laashshate looso jawaante loonsanni hee`noommomo” yiino.
Tayxe calla qara kilawera woriidinni laashshine 7 godo`laano alira qolle lossine karsa dandiinoonnitano kulatenni.
Kilawe gumaame ikkite suffanno gede assate giddoydinni mitto baara widinni lame godo`laano` soorrine kilawete giddora eanno gede assinoonnitano kulinohu losu harisaanchi, eo agarranninna gargarooshshu widoonni noo foonqe beeshshate wo`naaloonnita egensiisino.
Ikkirono, godo`laanote soorro assa woy hidha miinju aana xiiwo diabbitanno yaa ikkikkinni, yannate noo foonqe beeshshate ikkinota kule, ninke mixo shiimmadda worooni noo wedella alira qolle lossine gumame assate ikkinota xawisino.
Hawaasi Quchumu Lekkate kowaase xa noo jawaantenni kaajjte suffannoha ikkironna noo foonqe beeshsha dandiiniro tayxeta boowe kaaysa hoollannorichi mitturi nooikkita loosu Harisaanchi Kalaa Utteessi buuxisino.
Wole widoonni quchumunniti seennu kilawe Baahir Daarete assinanni hee`nooni heewora, Gimboolu kowaaseno hattono 20 diri wori godo`laanono Assellaho assine sa`noonni heewora umi deerra amdde massagani nootano Kalaa Utteessi ledino.
Xaa yannara Quchuminniti Ispoortete kilawe dancha guma borreessiissanni noohu Quchumu gashshooti murantinokki irko assanni noohura ikkinota buuxise, irkisaanote maamarino konneti yinannikki qeechasi falanni nootano egensiisino.
Bakkalcho Badheessa 29, 2014
