Abrahaam Saamueel
Sa`u lamalara Itophiyu atiletiksooti babbaxxitino gobbuwara kalqete deerrinni addi addi qeelle borreessiissino. Serbiyu Belgireedetenni kayisse Ispeenete, Roometenna Turke Istaambulete geeshsha culkunna wolootta meedaaliya baraadhino.
Sarbiyu Beelgireedete sase barra harinsanni keeshshinoonni 18kihu mini giddo kalqete shaampiyoonera Itophiyu umiha ikkite jeefissino.
Itophiyu heewotenni 4 culkinni, 2 birrenninna 3 nehaasete meedaaliyunni mitteenni 9 meedaaliyinni jeefisino. Ameerikunna Beeljiyeeme 2kihanna 3kki deerra amadde jeefissino.
Itophiyu Beelgireedete 18kihu mini giddo kalqete shaampiyoonera borreesiissino gumi xaa geeshha assinoonni heewonni luphi yiino gumaati. Itophiyu qolchanshote heewo aana borreessiissino gumi xeertinyi 1,500m labballunni Saamueeli Tafarrihu xiqqeessinni shaampiyoonete riikeerde hiqqatenni qeelino.
3,000 meetirenni labballu gobbanke riqibbe beeqqitinori Salaamooninna Lammeechi hoode hoode fulatenni culkanna birrete meedaaliya qeeltino. Salamooni Baareggihu 7:41.38 culka; Lammeechi Girmihu 7:41.63 saatenni eatenni birrete meedaliya afi’rino.
1,500m seennu 1-3ki geeshsha hoode hoode fulatenni qeelino. Gudaafe Tseggayeti 3:57.19 umikita ikkite culka adhitino. Aksumaawiti Ambayeti 4:02.29 saate borreessiise birre qeeltino. Hiruuti Mesheshiti 4:03.39 xiqqeessinni e`e nehaasete meedaaliya adhitino.
Seennunnihu 3000m Kalqete mini giddo jeefote heewora woy qolchanshora Lemlem Hayluti culka; Ijjigaayyo Taayyeti nehaase adhitino.
800m seennu qolchanshora Firehiwoot Hayluti 2kita fulte birrete meedaaliya adhitino. Heewote aana 2kiha ikke jeefisinohu Ameeriku 3 culka, 7 birrenna 9 nehaasete meedaaliya xaphoomunni 19 meedaaliya hattono Beeljiyeeme 2 culku meedaaliyinni 3kita ikkite jeefissino.
Seeda yannara Itophiyu ledo kaajjado ikke heewisamanni keeshshinohu Keeniyu 1 birrenninna 1 nehaasete meedaaliyinni 22kiha ikke jeefisino.
Itophiyu shaampiyoonete, 12ki Vaaleenshiyu Kalqete mini giddo shaampiyoonera 4 culka, 1 birrenna 1 nehaasete meedaaliya hattono, 2018 Awuropu kiironni harinsoonni 17ki Bermingihaamete kalqete mini giddo shaampiyoonera 4 culkunna 1 birrete meedaaliya borreessiissino yanna luphiima gumaati yine kulloonni.
Roomete assinoonni heewora atileeti Mukitaari Idiriisihu 10km doogote aani qolchanshora basete riikeerde hiiqqe qeelino. Atileetichu 28:34 ikkitino saate giddo e”e basete riikeerdeno hiiqqe qeela dandiino. Wole widoonni Turke Istaambulete harinsoonni boco Maaraatoone heewora Atileeticho Tsehay Gemmechuti 1:05.52 ikkitino yanna giddo e`e layinki deerra amadde qeeltino.
Xaano Atileeticho Beqqelechi Guddetiti 1:06.35 ikkitino yanna giddo dodde 3ki deerra amadde heewo jeefissinota Atileetiksete Federeeshinenni afi`noonni mashalaqqe caakeessitanno.
Konni garinni qeelle suffanni hadhino. Itophiyunnihu Fiqire Baqqalihu Labballu Roomete Maaratoonera haaro guma borreessiise qeelino. Atileetichu 2:06:48 ikkitino saatenni haaro guma borreessiise rikeerde hiiqqinoha ikkanna; Keenyunnihu Beenjaamiini Kipitooni 2009 Awuropu kiirora borreessisino guma hiiqqe umiha ikke heewo jeefisino. Atileetichu Taadesse Maammohu heewo 2ki deerrinni jeefisinoha ikkanna, Atileetichu Abrahaam Girmihu qole 4kiha ikke jeefisino.
Seennu widoonni Atileetitte Siicaale Daalasiti 2 saate, 26 xiqqeessinna 8 lipheessinni eatenni gobbasera culka abbitino.
Heewote baaqaancho ikkitinoti Atiteetitte Taaddelechi Baqqalitinna Yeshimebeeti Taaddeseti 3kinna 4kita ikkite jeefissino.
Bakkalcho Badheessa 22/ 2014
