2013 Beetiking Itophiyu Pirimeeliige Boowe dhaggensara umi yannara kaysate dhaggete uurrinshanni gugguufanni afamannohu Faasili Kenemu qeelle coommishi’rate mitte godo’le heewo calla gattannosi. Tayxeti pirimeliigete heewo doorantino onte quchummara hadhara mixi’noonni garinni Addisi Ababu Quchumira hanaffe; Jimma, Baahiri-Daarenna Dirre- Daawaho iillose assidhe jeefonniha Hawaasi Quchuma sa’ino.
Pirimeliigete Dirre-Daawaho assinoonni jeefote godo’le lemiina mittikki lamala mixora deerru shaera qaccete honse bixxille amadinoha Adaamu Kenema xaadinohu Faasili Kenemi 2:1tenni qeelasi harunse Dirre-Daawu keeshshosi qeelletenni gumulino. Konne guma harunseno Liigete Boowe kaysate Hawaasa hadhanno godo’lenni mitte godo’le calla qeela agarrannisi.
Hawaasa hadhanno pirimeliigete mixo Dirre- Daawu – Adaamu ledo, Itophiyu Buni – Wolayitta Dichu ledo, assitino lemiina layinki lamala mixo godo’lenni hanafinoha ikkanna albiidinke Qidaame soodo shoole saatenni Wolqixxe Kenemi ledo godo’lannohu Faasili Kenemi, tenne godo’lenni wo’ma sase bixxille afi’ra dandiiro woloota gattanno godo’le guma agadhikkinni Shampiyoonimmasi buuxatenni mitte miliyoone birra baraa’rasi buuxantanno.
Faasili Kenemi Qidaamete godo’lenni qeelle xaaddusiro mitte miliyoone birri baraarshira assanno Liigete Shaampiyoonimmate heewo hattono Afiriku Shampiyoonsiliige beeqqate heedhannosi qolchansho tumo afidhanno. Wole widoonni gattanno shoole lamala mixo godo’le Liigete layinkiha ikke gumulatenna Afiriku Konfedereeshiine Boowera beeqqaancho ikke lamalu xibbi kumi birri baraarshi heewo ikkitanno. Sayikkimeeshshi heewono ontu xibbi kumi birri baraarshi hee’rannohura sa’u dirra gede Shaampiyoone ikkanohu baxxi gedensaanni assinanni heewo qiidado di-ikkitanno.
Faasili Kenemi Qidaamete godo’le qeelasi Boowe kaysate iillishisirono Boowe adhitanno amanyooti albiidinke Onkoleessa settunni ikkannota buunxoonni.
Konninnino Faasili Kenemi Shaampiyoone ikkate hasiissannosi sase bixxille xaanni afidhuro woy Itophiyu Buni bixxille tuganno hedeweelcho kalaqanturo Faasili Kenemu Onkoleessa settunni Sambatu barra Dirre-Daawu Kenemi ledo heedhannosi godo’lenni Boowe adhitanno gede buunxoonni. Liigete Shaampiyoone sai aganira Liigete Shaampiyoone ikkinohu dhaggetenni umi yannara mitte miliyoone birri baraaraancho, layinkiha ikke gumulannohu lamalu xibbii kuminna sayikkihu onte xibbe kume birra baraaranno gede egensiisino xawishshinni Liigete Shaampiyoona ikkitanno gaamo buunxi gedeenni gattanno godo’le agarrikkinni woy Liige gumulantukkinni Boowe adhitanno gede egensiisasi qaanganni.
Faasili Kenemu shoyilliina honse bixxillenni Liige massagatenni harunsaanchise Itophiyu Buninni tonaa lee bixxillenni fafino. Lamunku Boowete heewisamaano gaamo albisaano eote kiirsiisaano ikkitinori Mujibi Qaasiiminna Abubekeri Naasirino beeddakko eote eessaanchimmanni heewote diro gumulate assitanno heewo boode eo badooshshinni suffino.
Liige Baahiri-Daarete noosi keeshshonni gumultu yanna geeshsha batinye eo marawete xaadisatenni malaa’lisanno harinsho noosihu Itophiyu Buni eote kiirsiisaanchi Abubekeri; Dirre-Daawaho noosi keeshshonni hanafosi gede batinye eo kiirsiisa dandaa hoogirono Geetaane Kebbedehunni amadantino Pirimeliigete ay woyteno eo kiirsiisate ayirrinyi danna woyyeessate dibarrinosi. Abubekeri lemiina lame eonni beeddakko eo eessate deerra massaganni afamannoha ikkanna Geetaane ayirrinyi danna hiiqqate gattanno onte godo’lenni onte eo calla kiirsiisa ikkitannosi. Faasili Kenemi beeddakko Mujibi Qaasimino tonaa honse eonni harunsatenni beeddakko eo kiirsiisate heewo bisooti.
Addisu Adoola
Dotteessa 28/2013
