Abbebech Maatewoos
Mitte gobbara dancha eo eessitannori, ammanantinorinna loossanno loosinsanni naaxxisiissannori, danchu allaalaanchi gede gereewo allaala egentinori, mootoollinsanninna mannu baalunni baxantino woshshi no.
Lowo dirra albaanni Ameerikaho mittu manchira lowo Gereewi noosi. Gereewosino agarannohu mittu jawu Woshichi noosi. Kuni Woshichino mittu kumi geeshsha ikkanno Gereewo agarate dandoo noosi.
Barrunni mitto barra Woshichu Gereewo mitto hala`lado xawo haa’re ha’ri. Hakko hossino xawira hedeweelcho lowo xeena gani. Hattee yannara guunjo batidhino daafira Gereewu xee`nate dubbo hige farsha yii. Farsha yiiro nafa Woshichu jawaatanna dancha allaalaancho ikkinohura hase mitto darga gamba asse minira haa`re ei.
Waalchoho uurre Gereewu anni Gereewosi kiiri. Kiiri gedensaanni Woshichosi “Mitte Gerecho baxxite ba`ino; xa rakke hadhe hasse abbi” yiisi. Woshichuno mootichisi hajajo hegerse wirro xeenanna guunjo, tunsichono waajjikkinni hasara fuli.
Woshichuno qiidunninna guunjotenni amadame, huxi`ranni Gerecho hasa sufi. Lowo daafurinna qarri hattono lowo yanna hasanni keeshshi gedensaanni hattenne hasanni noo Gerecho lowo lixu sabbi giddo e`e moyichunni qoqqowante noota afise. Mo`ano xa konni sabbi giddonni fultanno ninkeno inteemmose yitanni ofoltanninna uurritanni agartanni noose. Ammanamino allaalaanchi iillise yannara hattenne ba`ino Gerechora tashshi yiise. Woshichuno hakkawoyntenni ittasera doyissitinose moyicho shorre, ise lixu sabbi giddonni goshooshe fushshese hagiirrunni minira massise. Gereewu annirano lowontanni tashshi yiisi.
Hakkonni gedensaanni Woshicho lowo geeshsha daafursinosi daafira gaxanno bayicho ha`ri. Hakkawoyntenni Gereewu anni babbaxxitino sagale abbe albasiinni worisi. Woshichu kayinni arrawisinni laaxanni egemma ayirritinosi daafira illetenni calla la’’anno. Shiimu xiqqeessi gedensaanni quwa sae daafursinosihura mitte hige nafa egemmikkinni illuwasinni Gereewonna mootichasi la’’anni hee`re reyi. Kuni Woshichi isi heeshshonni roore mootichasinna Gereewo baxi.
Tenne dhagge giddonni lowo roso adha hasiissannonke yee ammaneemma. Korkaatuno baattote aana lubbotenni hee’nummo geeshsha duuchunku babbaxxitino yawo noonke mannaati. Mittu mittunku babbaxxino garinni gobbankera, dagankeranna maatenkera hattono kalaqamu baalira dancha allaalaancho ikkatenni baxillenke leellisha hasiisannonke. Dancha allaalaanchimma ammanamatenninna loosunni xawinsannite ikkinnina dudumbe calla sa`nannita dikkitino. Ikkinohurano allaalaanchimmate hayyo uddi’ratenni wolootahono hee`no.
Bakkalcho Badheessa 22/ 2014
