Tenne lamalara hananfoonnihu addi addi shaampooni duuchu ispoortete daninni harinsanni hee’noonnihu qoqqowu deerrinni wo’mante woraddanni filantino heewisamaano beeqqano ikkitanni afantannota Sidaamu Qoqqowi Ispoortete komishiine Komishiinerchi Firew Areerihu Bakkalcho gaazeexira xawisino.
Komishiinerichu Firew Areerihu xawisanni, tayxe qoqqowu deerrinni togooha addi addi ispoortete daninni umi doychora harinsanni hee’noonnita xawise, niro harisate mixo amandinoha ikkirono yannate noo kooviidi fayya taraawonni shaampoona harinsikkinni sa’noonni yiino.
Tenne shaampoona harinsanni hee’noonnihu xaphoomunni ispoortete dana amadinoha ikkanna, baxxinohunni qara qara ikkitino ispoortete dani aana illachiinshoonnita Komishiinerichu buuxisino
Lekkate kowaase, atileetikse, marawete kowaasenni, xarapheezu kiwadenni, kalqete tekowaandonni, paara olompiketenni lamunka ko/te deerrinni heewisiinsanni hee’noonnita Komishiinerichu Firew egensiisino.
Addi addihu ispoortete dani shaampoonahu qaru illachi ikkaddanna doorantino ispoortenya filate ikkinota kulinohu komishiinerichu, tekinikete komite qixxeessine baalante ispoortete daninni ikkadanna dhuku noore filate looso loonsanni yiino.
Ikkaddanna dhuku noo ispoortenya laashsha hundunnu hananfe ikkinota qummi assinohu Komishiinerichu Firew, konni albaanni togoo looso loosate ispoortenyootu milli yitannoo xawi qarra ikke keeshshino; gobbate deerrinnino illacha assinoonnihu jajjabba istaadiyemera calla ikkasi ikkadda ispoortenya afi’ra
hoogate korkaata ikke keeshshinota kulino. Konne qarra ikke keeshshinoha ispoortete xawo eeli geeshsha dirrine dureeyyete ledo halamatenni qineesate looso loonsanni yiino.
GObboomu deerrino ikko qoqqowaho ispoorte mootummate badhenni xaa geeshsha dirritinokki daafo dagate irko heedhanno gede assinannita huwachishino. Ispoorte kaajjinsh sfisate addi addi eo hasatenni irkisa noota komishinerchu Firew qummi assino.
Tenne shaampoonera woradatenni woyyaabbino ispoortenya filleenna ispoortetenni ikkadda ikkitinore gamba assinoonnihura ikkadda ispoortenyootu filantanno yine ammaneemmo yiino.
Addi addihu ispoortete shaampoone lame lamala geeshsha suffannota kule, heewisamaano tenne heewo danchu ispoortete akatinni baxxillunni mittimma kaajjishanno garinn jeeffa noose yee sokkasi saaysino.
Abrahaam Saamueel
Bakalcho Badheessa 15, 2014 M.D
