Yinoyiri ba’antenni illoonnihu ba’’o yaanno maammaashshu; coyi’ne coyi’noonnire gumulsa hoogatenni coyi’ra hooganna agura woyyitanno. 27 dirira kaphunni godowa fuugissanni keeshshitino HWHT keerunni yinummonkunni kuneeti dirra kiirantu. Ikkollana insa ayyaaninni wo’mitino mite mite massagaano riippoortetenni calla ammantannori di hooggino.
Mitte hige DHDN wodiidi qoqqowa gashshe hee’reenna daga hasaawisaranna ammanchishara dayinohu doorshu yanna ikkasinni ammanchishate togo yi:- “ Halaale halaale yeemmo’ne konni lewu/6/ again giddo caabbichunna doogo konni qooxeessira wo’munni wo’ma lata hoogguro anje’ya guuto worre’e” yee xaari.
Mule’ya noohu geerchu isi xaara mishe togo yaanna macca gantu’’e “ manchu coyi’renso balfe dirri” yaanna. Anino mayira yiitto yuummota ikkaakkire coyi’reennaati;jawu manchi kaphanna saalfateeti” yaanno.
Hakkawaro togoonni balfinanni sa’noonnina xa kayinni Jireenyu xirchi hattooha di lawanno’’e;ikkollana albi gashshooti ayyaani noonsari rahotenni base agurturo woyyannoha lawanno’’e.
Jireenyu paarte 6 bixxille amadino uurrinshu xawishsha fushshitu wote kaaliiqi dandaa oo’ne;macciishshitinoonniha loosu aana hosiissananni gede dhuka kalaqo’ne yee maassi’roommo.
Sheemaatu ammanamooshshu asaleeti;ee asaleho. Umikki Jireenyu paarte songo kayinsoonni hajubba macciishshitino daga hagiirrensa xawissino.
“caacceessinonkere Jireenyu bade fushsha umisi qarra tirano hoongiro ninke tirroonninkehu gede assineemmo” yite ikkollana yitanno; “ikkollana seedu dirira togo yinannanke keeshshinoommo;albi kapho kapho ikkinota affini eega hurre abbitinanni yine hexxotenni agadhineemmo” yitanni giddonsata kultinonke.
Loosu hoongi kisinokki mini ayeti? Mussinnunna muishshu, ayiddoomittenna bainchu loosi caacceessinokkihu ayeti? Miteekke biilloonyu aana noo manni ayidde ikkiro ikkinniina?! Ee! Jireenyu paarte moorunna mussinnu aana,loosu hoongi,bainchu loosinna heeshshote sutama aana illacha tugge gaadate fushshitino xawishshi kassi assanno.
Xawishsha fushsha calla ma waagi noosi?! Eeli geeshsha dirrine dagate qarra tira hoongiro.? Jireenyu paartera mereerimu komite loosu gumulsaano daga owaatate woyyo e’e daggino.
Tenne e’ino woyyo loosu aana hosiissuro Itophiyu lopho muleeti,daga caacceessinori diilallote gede ba’anna la’neemmo barri muleeti.
E’noonni sheemaati kokkete gatanna,borreessinoonni wodho woraqataho bultanna la’noommo diri bacare rosiisinonke. Qullaawu maxaafi “Qaalu Maala ikki” yaanno konni garinni massagaano e’anno qaali loosu aana ragunni hosiro ninkera jireenyinke adda ikkino yaate. Jireenyu paarte mereerimu komite e’ino sheematenna woyyo adhite oyimbarra daggino daggino qoqqowira higgino.
Anino konne Addis Ababaho fushshunoonni 6 bixxille uurrinshu xawishsha gumulate widoonni fultanno yawo xawissankera Sidaamu qoqqowi jireenyu paarte borro mini sooreessanna mereerimu komite miila kalaa Abrahaami Marshaalloha hasaawisate wo’naalummo wote “ Songo uyitinonke yawo bayi’rate;dagano taaga doortunke waro hashsha barra yitukkinni,arrishsho xeena waajjitukkinni;massaggannonke yite ammante doortinonke.
Konni daafira dagano Paarteno ammante uyitinonke yawo ragunni fulate hinkonke ga’mi’ne loonseemmo” yaanni giddosi laala xawisino.
Konni garinni duuchunku adhe harino yawo fuliro ledamatenni Itophiya sufisa dandiinanni.
Itophiyunnihu jireenyu adda ikkannoti huluullo dinonke! Macciishshinoommore loosu aana hosiinseemmo gede kaaliiqi wodana fanonke; sheemaatu ammanamooshshu asaleetina dagate e’noonni sheema gumulsa dagate hexxootina loosu aana hosiinsanni gede jawaata hasiissanno.
Yaareed Getaachew
Bakkalcho Badheess 8, 2014 M.D
