Rosu uurrinshuwa ledo qinaambe loosa Itophiyaho leeltannota Ispoortete xawi anje tirate dandiissannota xawinsi Ispoortete latishshi aaana sa’u lamalara harinsanni keeshshinoonni hajo la’annonsa bissa hasaawu ba’re aana xawinsoonni garinni; babbaxxino qooxeessira leeltannota gangalatu base anje tirate rosu uurrinshuwa ledo loosa hasiissannota ammannoonni.
Hasaawu ba’re aana rosu minnara afantanno Ispoortete base gashshootinna horonsirate aana wolootu gobbuwa rosicho amaddino borro dokter Waaqjira Simahunni shiqqino.
Ledoteno Ispoortete Investimente aanano wolootu gobbuwa rosichonna Itophiyaho noo akata hattono mitiimmanna tirote hedo amaddinoti budunna Ispoortete ministere Investimentete jawiidi ogeessi kalaa Meseret Taaddegehunni shiqqino. Shiqqino borro aana hasaawa assinihu gedensaanni leellannoha gangalatu xawi anje tirate rosu uurrinshuwa ledo qinaambenna halamme loosa hasiissannota sumuu yinoonni. Budunna Turizimete ministere Ispoortete handaari ministr dieeti Ambaasaadder Mesfin Cherinnetihu; aantete gangalatu base aana illacha
tunge loosate mixo qixxeessine taje yannaasincho assa hasiissannota xawinsoonni. Gatamarshinsa jeefaminokki xawubba gumulantanno akati aana illacha tunge loosa hasiissannota huwachishinnohu Ambaasaadder Mesfini; ministerete loosu mini kaimu taje qixxeessatenni gumulo harunsannota qummi assino. Ispoortete Investimente lainohunni dureeyye beeqqisiissino ba’re harisa hasiissannota xawisino.
Ministrdieetu xawishshi garinni; ispooretete safote latishshi foreme rosu uurrinshuwa ledo loosate mamiinni hanafa hasiissannoro seekke buuxate kaa’litanno.
Rosu uurrinshuwa noo akata afa calla ikkikkinni rosu minna giddo noo mitiimma gatisate kaa’lanno dhuki noota huwatatenni rosatenna rosiisate harinsho aana hiittoo qarrino kalaqamikkinni garunni gutu horonsi’raanchimma kaima assino garinni horonsi’ra hasiissanno.
Ispoortete Investimente aana dureeyye goshooshate xiinxallo assatenni horonsi’raanchimmate aana dureeyyete hedo kalaqa hasiissannota huwachishinno. Ispoortete base latisa Ispoorte wo’mante gobbara halashshate kaa’litannota ba’re hasaawunni faninohu budunna Ispoortete ministrchi kaaa Qejela Merdaasahu; duuchanta harinsho shiqishotenni hananfe hasiisanno uduunninni wonshine garunni massangiro ikkado guma borreessiisa dandiinannita xawisino.
Ispoortete latishsha lossate mitte mittenti millimmo garunni massagama hoogguronna sayinsete bikkaanchinni keenama hoogguro hasi’nanni gumi borreessamannokkita coyi’rino. Ministrchu; ‘’Ninke budunna Ispoortete ministerenna hajo la’annonsa bissano Ispoortete 12 Badheess 1, 2014 M.D Hamuse xawinni uduunnu shiqisho geeshsha noo e’’o wonshate tungoonninke eeggo fulate murciraanchimmatenni loosa agarantannonke’’ yino.
Ispoortete xawo lainohunnino seeru hanqafo widoonni lallawa kaima assatenni seeru hanqafo fulte gumulantanno gede ba’rete beeqqaanonni hedo kaino. Addi addi Ispoorte halashshatenna dagooma beeqqaano assate Ispoortete xawubba anje jawiidi mitiimma ikkite dirra kiirsiissino.
Sa’u tonne dirra kawa konne qarra gatisate dandiissannore jajjabba xawubba babbaxxitino qoqqowubbara gatamarranni heee’noonniti qaangannite. Ikkeennano xawu gatamarshi xaa geeshsha jeefamara didandiino. Konne xawu gatamarsha hendoonnikkihonna gangalatu base anje di tirtanno yitanno hedo ka’anni keeshshitino.
Konnirano mootimma Ispoortete xawi anje tirate jajjabba xawubba gatamarantenni manaadda xawubba gatamarate illacha tuga hasiissannoseta Ispoortete maatenna ogeeyye hedo wortanno.
Baxxinohunni jajjabba quchummara noori shiimaadda xawubbanna gangalatu base wolu gatamarshira hossannokki gede mootimma agarooshshe assitansara hasiisanno yitanni batinyootu hedonsa wortanno
Qiddist Gezaheny
Bakkalcho Badheessa 1, 2014 M.D
