Addisi Ababa:– HWHT nna Shene cancishaanote gaamo assine gaammiro babbaxxitino kalqete gobbuwanninna gobbate giddonni afidhanno kaa’lo ajjannohura babbaxxino gobbanke qarqarira iillitanno huno ajjannota Seeru Ogeessi Kalaa Cherinneti Hordofihu xawisi.
Kalaa Cherinneti Hordofihu Addisi Zemeni gaazeexira xawisino garinni, lamenti hunote gaamo huno iillishshanni keeshshitinohu babbaxxitino kalqete gobbuwanna gobbate giddonni assinanninsa kaa’lonniiti.
“Gaamo cancisaanchimmatenni gaamanturo kaa’lo diafidhanno. Kuri cancishaano uurrinshuwa miila ikkannohuno dihee’ranno. Qajeelsha aa didandiitanno. Kaa’lo assitanno hiitti bissano cancisaancho yaamantanno daafira dikaa’litanno” yiino.
Seeru ogeessi xawishshi gede, lamenta hunote gaamo cancishaano yaate dandiissiisanno cancishshu huno iillishshino. Cancishaanchimmate loosi yinannihu mitte gaamo woy manchi woy uurrinsha, politiku, amma’note, riyooti-alamete mixonsa qineessi’rate yite wolqatenni mangitte woy daga gideessatenni huno iillishurooti.
Hunono manna shaa, safote latishsha diiga, daga daransiisanna labbannoreeti. Konne assinoha baala cancisaanchimmate looso loosino gede kiirranni. Hunote hajajo uytannorino cancisaanote. Tenne tiro garinni Hiwwahaatinna Shene xawo cancisaanchimmate looso loosansa xawisino.
“Shene Ertirunni keerunni dagge wirro qodhote sharrora e’ino. Keeraanchu hasaawi widira abbate wo’naallirono ikkikkinni gatino. Mangitte wolqatenni karate wo’naala cancisaanchimmate loosootino” yiino.
HWHT xawo cancisaanchimmate looso loossino yiinohu Kalaa Cherinneti, Aliiyye hajajo gargartote olantonna maykadiraho keeraano qansooti aana iillishshino huno mittoreno karsamannokki xawo cancisaanchimmate looso ikkinota egensiisino.
“Gobbankera babbaxxino qarqarira keeraanote aana iillitino gawajjo kuri bissanni ikkitinota gawajjamaano coydhino; gawajjo iillitinonsa bissa konnira naqaashshe ikkitara dandiitanno yiino Kalaa Cherinneti, cancisaaso kalqete deerrinni su’minsa ba”annokkinna kaa’lo hooggannokki gede yawo adhitannokki gedeno coy’rino.
Uurrinshuwa yawo adhituro qarru giddo ubbannota affinohura yawo diadhitanno; loosu insaha ikkinota kayinni mangittete mashalaqqeno naqaashsheno noose. Uminsano xawoho coydhinorichinohu naqaashshe ikkannota qummi assino.
“Lamenti uurrinshuwa gaamotenni tantanante afantinoreeti” yiinohu seeru ogeessi; dagate riqiwaano amaale mine muro sa’ara albaanni shiqqe konni loosira bobbakkinokki gede huwachishiishate qoosso noonsa gedeno xawisino.
Yekkeerante qeelante cancisaasine yaamanturo ayno insa ledo millisa didandaanno. Uurrinshuwano cancisaanchimmatenni gaamantu gedensaanni ledo loosannohu baalu cancisaanchu gede kiiramanno yino.
