Hawaasa:-Sidaami Gutu Baanke aksiyoone hidhate dagate beeqqo xaa geeshsha danchu garinni hadhanni noota Sidaami Gutu Baanke Yannate Ganbisaanchi Kalaa Abrahaam Maarshaallohu xawisino.
Kalaa Abrahaam Maarshaallohu Itophiyu Pireesete Uurrinshira baxxinohunni Bakkalcho gaazeexi ledo assino hasaawinni; Sidaami daga lowo yanna sharrante umise umose gashsha hanafunkunni boco diro saino; Mitte dagara womaashshu uurrinshi hoogiro manni anga yortannota ikkitanno. Konnira qoqqowo ikkinumoti konne qoqqowo kaajjinshe albilicho harisa dandiinannihu kaajadu womaashshu uurrinshi hee`riro ikkinota seekkine anfe Sidaamu Gutu Baanke uurra hasiissannota buunxe;Itophiyu Biheerawete Baankenni fajjo afi`noonnita kulino. xaa yannara daga aksiyoone hidhatenni danchu garinni beeqqaano ikkitanni nootano xawisino.
Kalaa Abrahaam xawishshi garinni, mitte daga bowirte lophate kaa`lannosehu polotikunna jirote beeqqonni hattono taaloonyu hee`risero Itophiyu daga ledo heewisama dandiitanno. Maafamme nooikkiha afoose, budesenna balchoomase losidhe taallo ikkite umise umose gashshite, polotikunni ikko dagate ledo taalo ikkate dhukka afidhannohu miinjunni taalturooti. Buxicho mancho, maafaminoha biifinokkiha mannu di-naadanno. Konnira, ninke qoqqowo adhinoommo daafira ikkikkinni, Minjuninna jirotenni kaajadda ikkinumoro woloota qoqqowubba ledo heewisamanna polotikunni kaajja dandiinannita huwachishino.
Hiitenne gobbarano jirote bue baanke ikkitino daafira, qoqqowinkeno federaalete noosi qeechano gotti assi`rateno womaashshunni kaajja hasiissannosi yee; shiimu woxinni ikkikkinni jajjabba woxe fushshine ikkado ogeeyyenna fulahaano qaxarre jawaata baanke ikkitanno gede loosa hasiissanotano ledino.
Sidaami Gutu Baanke xa noo deerrinna loonsanni hee`noonni loosi addi addi Sidaamu giddo noo daddalaano ledo hasaawa assine aksiyoone hidhate dandiissannonke kalaqate dureeyye fille hasaawa assine injo noonketa buuxa dandiinoommo yino.
Tenne baanke uurrisate noonke injo maati yaannohanna Biheerawete Baanke wonshe yitinonkeha baantoonniha 5 xibbe miiliyoone qaale e`noonniha; 2 biiliyoone birra wonshate mittu qarri nooikkitanna lowo jajjinna woxi noonketa buunxe wonsha dandiineemmo yine gumuloommo..
Konnira, 2 miiliyoone aksiyoone noote giddo mittu manchi woy dirijite 10 aksiyoonenni kaayse 100 aksiyoone geeshsha hidha dandiitanno daafira konne looso loosate balanxe huwanyo uyne aksiyoone hirate widira hingumo yee gambisaanchu coyrino.
Sidaamu Gutu Baanke rosse mine noo wedellira hala`ladunni loosu kaayyo kalaqannotano kulikkinni disaino. Sidaamu Gutu Baanke aksoonete hi`ro Sidaami giddo noo baankeranna Daddalu Baankera hi`ranni hee`noonni daafira rosino wedellira xaanni loosu kaayyo kalaqqanni noota ledino; xaano 40 ikkitanno ogeeyye qaxarrara borreessine fillanni hee`nonitano kulatenni.
Muli barri giddo Itophiyu Biheeraawe Baanke haroo Baanke safi’rate aana woyyeessitino lallawi; xa Sidaami Gutu Baanke uurrisate aana mitte huluullono kalaqannokkita buuxisino.
Sidaami Gutu Baanke fajjo afidhunkunni xaa geeshsha mixose ikkadu garinni gumulo afidhanni noo; 15 barri giddo baanke baala hajo gudde uurritannota Ganbisaanchu Kalaa Abrahaam Maarshallohu guwursino.
Daga aksiyoone hidhatenni dona wodhite baankete anna ikka hasiissannotanna miidiyuno tenne haaro Sidaami Baanke daga huwanyo afihdanno gede loosa hasiissannonsa yee sokkasino saayisino.
Abrahaam Saamueel
