Sidaamu qoqqowi Pirezidaantichi Kalaa Desta Ledamohu hagiirressi xawisanni “Daafurtannokkinna hexxo murtannokki daga anga hiddaasete kofattora jawaata cigilensanni Itophiyaho caabbicho burqissino” yaatenni xawisino.
Pirezidaantichu Bayiriidi haaroo`mate kofatto caabbichu wolqa burqisa hanafasenni Duuchunku Itophiyu dagara hawalle hagiidhitinoonni yitanno sokkano sayisino.
Itophiyu daga dirrate biirenkenni, kiirote borronni hattono humeessuwankenni abbayi daafira gaabbonke, hasattonkenna baxxillenke xawinsanni keeshshinoommo yaatenni qummeessino.
Techo kuni baalu layinki higaakki ikke soorraminotanna haaroo`mate kofatto mittimmanke gurdaasinchooti yinohu pirezidaantichu; Abbay bareendete malaate ikkinota sokkasinni xawisino.
Konninnino sa“e gutu dhagge sumudanna malaate ikkinota xawise; kunino dagganno ilamara dhaggete malaate ikke taraawanno yino.
“Sannate abbay Itophiyu mudukkinni burqe wole gobbuwara jiro ikkanna la“a gaabbisanninna giddo itanni keeshshirono xa kayinni abbay eltonna atootu beeqqaasine ikkankenni Itophiyu daga hawalle tashshi yiino`ne yino. Baxxinohunni piroojekite amandoonnise yannanni jeefisantannokki gede gificho ikkitino baincho assootubba suwisatenni; kofatto adda ikkitannokki gede hasidhanno gobbayidi baarigaarra xiiwo dandaatenni; maaxantino sharre dunneesse; kofatto daganke horora hassanno gede assate qaraartino sharro asse xa gumaho soorrino yee dhaggeeffatino.
Ninke Itophiyu daga haaroo`mate kofattora assinoommo mittimmanna bareende kaajjillenke leellishannoho yinohu pirezidaantichu kalaa Desta Ledamohu; Itophiyu ka“onna jireenyu gumi xeerto ikkannokkita buuxa dandiinanni yino.
Tini ilama bayiriidi Itophiyu haaroo`mate kofattora farciraano ikka dandiitinota buuxisiisinohu qoqqowu pirezidaantichi; mittimmankenna wodanunniha kaajjillenke latishshunna jireenyu doogo aanano leellisha hasiissannonke yee hedisiisino.
Wodiidi qoqqowi pirezidaantichi Kalaa Irsittu Yirdsaw isi widoonni Bayiriidi Itophiyu haaroo`mate kofatto duuchunku gobbanke daga hunkiinni loosamino Afriku caabbichooti yaatenni hagiirresi xawisino.
Kofatto wolqa burqisa hanafasenni duuchunku Itophiyu dagaranna qoqqowu dagara hawalle hagiidhitinoonni yitanno sokka sayisino.
Kalaa Irsittu sokkasinnino bayiriidi Itophiyu haaroo`mate kofatto Itophiyu daga hunkiinni loosamino Afrikaho caabbichu heellicho ikkinota xawisino.
Qoqqowu daga noonsaha tayisidhe piroojekite adda ikkitanno gede assate assitino kaa`lora umisinna qoqqowu mootimma su`minni galata shiqishinohu pirezidaantichu; mittimmanke kaajjinshummoronna halammummoro buxima dhagge ikkitanno yino.
Itophiyu ayirrinyinna su`mu konni aleenni xawe leellannota ammano`ya kaajjitinote yinohu kalaa Irsittu; Baarigaarranke ba`u laaffu yitannanke ninke gittimmate aana afammeemmo yee coyi`rino.
Caabbichu giddo wolqa, mittimma, lophonna jireenyu luphi yee leellanno yinohu pirezidaantichu; bire bareedda annuwinke ayirrinyunni keeshshiishshinota ayirrado gobba kaajjado safo aana ijaarsatenni ka“ose la`neemmo yino.
Pirezidaantichu sokkasinni yino garinni; konne qeellete caabbicho la“a dandaankenni hawalle hagiidhitinoonni yaate hasi`reemmo yinota qoqqowu mootimmate komunikeeshiine hajubba biironni afi`noommo mashalaqqe leellishshanno.
Abbebechi Maatewoos
Bakkalcho Ammajje 17, 2014 M.D Hamuse
