Kalqete 90 iillitanno gobbuwara 120 miliyoone ikkanno manni bowuliingete ispoorte godo`lanno. Itophiyu giddo kayinni kiiro ajjino yaa dandiinanni.
Ikkollanna bowuliinge gobbate giddo lekkate kuwaasenna atleetiikisete ispoorte gede seeda diro keeshshitino. Itophiyaho 1952 M.Dnni hanafe bowuliingete ispoorte assinanni keeshshinoonniha ikkanna; Ertira lede shoole babbaxxitino gobbate kifile giddo godo`linanni baseno noonkanni. Insano Riche (Embuay mesk), Genneti hoteele, mekkonninootu kiwawenna albi Ertiru gizaate ikkansa Itophiyu bowuliingete asooseeshiine pirezidaantichi kalaa Miniliik Habitu coyi`ranno.
Itophiyu kalqoomu bowuliingete federeeshiine miila hattono Afriku bowuliinge federeeshiine xintaanchonna loosu gumulsaano komite miilaati. 37ki yannarano Itophiyu tenne ispoortenni kalqete boowe beeqqitanna; Afriku champiyooninni gaamotenni qeelte boowe baraadhinotano pirezidaantichu qaagiissanno. Boode dirra kawa kayinni ispoorte qiidawartino. Konnirano korkaatu gede kullannihu mereero mittu ispoortete wuddinnateeti.
Tenne ispoorte gumulate minunna godo`linanni maashiine hee`ra noosi; konneno wonshate luphiima gobbayidi soorro hasiissanno.
Albi hoshshote base mereerinni gatinohu Genneti hoteelera noohu calla ikkanna; layinkihu kayinni dirra kiirsiisinohu laafto moolira afamannoho. Riche (Embuay meski) yinanni woshshinanni basera siidiini olompiike gedensaanni olompiikete komite ispoortete hoshsho base ijaarsinanni gede assinoonnita harunse tini ispoorte mereershaho mitteenni amadantanno yinirono ijaarshu xaa geeshsha adda ikkara dandiinokkita pirezidaantichu xawisanno. Lawino garinni alba nooti kilawete kiiro 20 ikkiturono xa kayinni settu callu loossanni no.
Tini ispoorte wole kalqera ay woyteno harinsannita ikkitanna; dagoomitte xaadooshshe kaajjishannonna diru badooshshinni hoo`lanniha ikka hoogasinni baxamaancho assinosi. Qoqqowubbate hattono luphiima rosu mereershuwara tini ispoorte heedhanno gede asooseeshiine wo`naalsha assitanni noota coyi`rannohu pirezidaantichu; Addis Ababaho, Oromiyaho, Amaarunna Wodiidi qoqqowira asooseeshiinoota uurrinsanni gede assinoonnita huwachishino.
Hoshshote baseno ajunni hanafante loosantanno gede assatenni sa“e; kalqoomu federeeshiineno kaa`lo assitanno gede wo`naalsha assinanni afammanni. Konni sa“e ispoorte kaajjishate oosote aana loosa hasiisannohura diru tuqa 60 iillitanno ooso qajeelshate asooseeshiine mixo amaddino. 9 dirinni hanafe tenne ispoorte giddora e“a dandiinannihura Itophiyu olompiike komitenni qodhonna wole kaa`lo uynanni. Kalqoomu bowuliinge federeeshiine ledo halamatenni qajeelsha lafitto mool (borellamaar vinteej) hattono Genneti hoteelera hanafamino. Badheessa 24 geeshsha sufanno qajeelshi aanano kaimu hedo hottono loosunni kaa`lamino qajeelsha uynanni.
Lophitannori ispoortete giddora e`u gedensaanni fincantannokki gede kilawete aana gadachishshanno wodho heedhanno gede assate ledo amadisiisame kilawubba tantanonsa biddi asidhara loonsanni hee`noonnitano pirezidaantichu coyi`rino.
Abbebech Maatewoos
Bakkalcho Ammajje 10, 2014 M.D
