Addis Ababa:- Albi ejjeettuwanke gede ayeerano aleenni gobbanke balaxinso yaanni xaphoomu ministerichi Abiy Ahmedihu woshshatto shiqishi. Gobbanke yanna baala waaga baantannase xaa geeshsha iillitino; konni gedensaannino suffannohu waaga baattanno oososenni ikkinonotano egensiisino.
Xaphoomu ministerichi Dr Abiy ejjeettuwate barra lainohunni hawalle iillishi`ne yitanno sokkasi aana; konne barra worbuullu ejjeettuwanke gobbanke ontu diri Xaaliyaanete horronni keerancho assitino barri qaaggooshsheeti; konne barra hendeemmo woyite worbuullu ejjeettuwankenni sase coyibba ronsanniiti yino.
Umihu ayeerichira aleenni gobba balaxisiisate yinohu xaphoomu minisiterichi; yannate noori baalanti ejjeetto nugusu gashshootinni hagiidhitannore sumuu yitannorenna irkissannore di-ikkitino.
Mootimmate gashshootira abbooshshidhannori, xiiwantinori, addi addi doorshi gashshootu garinni shiqishshannoreetinkanni.
Yannate baarigaaru angasi aana noo wolqa roore qeelaancho assannoe yee hedinoha Itophiyunnita laalanna abbooshshe uduunnu gede horonsi`rara millimillo assinonkanni.
Nugusu ledo baxantannokkirinna godowinsa giddo abbooshshe amaddinore biilloonyunninna dogisiisatenni sammi yitaa gede asse; Itophiya cu’mate hasattosi gumaamo assate wo`naalino. Ikkollanna kayinni baalanti ejjeettuwa gobbansara ayirrinyu, baxillunna miliqqi yaannokki uurrinshi noonsa.
Laynkihu gobbate daafira ayino agara hooga ikkinota buuxisiisinohu xaphoomu minisiterichi; gobbate daafira baantanni waagira ayino xa`mara, qineessitanno gede woy kakkayisara diagarranni. Qansichu baalunku afinoha, ammaninohanna dandaannoha assate umisinni kakka’’a noosi. Ejjeettuwanke rosiissinonkehu konneeti. Yannate nugusichu gobbatenni fulinno. Qineessate dandiitanno uurrinshuwanna minisiterenniti loosu minna dinoonka. Hatte yannara qansootu gobbansara meessaneetensaati qineessitinohu; baajeette, mannu wolqa, addi addi uduunne dixa`mitino. Korkaatuno aannohu dinona. Amadde fultinohu uminsa uduunne, uminsa sinqe, meessaneetonsa calla ikkinnota coyi’rino. Hedeweelcho sinqisidhinori ledo gobbate baxille wodaninsa giddo amadde fultino daafira hakku siiwo ikke mittimmansa kaajjisheenna mittu oli gede ikkite baarigaarinsa ledo qasantanno assinonsaha ikkara dandaanno; kayinnilla gobbate baxilli daafira aye kakkayishshano woy hiitte uurrinsha irkono dihasiisinonsa yino.
Sayikkihunna qaru coy gobba gatisannohu qansootu mittimmaati. Ejjeettuwa qarqarinsara sharronsa hanaffino. Sharronsa guma laala hanaffinohu kayinni raga baala mimmitu ledo qinaabbanninna halantanni daggu woyteeti. Dandiitannori leellite, dandiitinnokkiri kayinni sokkatenni xaaddanni mittimmansa kaajjishshu. Giddoyidirinna gobbayidiri ejjeettuwa qinaabbu. Gare, afuunna amma`no guffa ikkitunsakkinni gobbate hajo mitto assitunsa. Mitte gobbara mittimmatenni uurritu. Togo ikkansano gumansa keeshshikkinni mixidhanno gede assinonsata xawisino.
“Ninke kuri ejjeetuwa oosooti. Albi ejjeettuwa uyitinonkehu gobbanke agadhate asali noonke. Gobbanke yanna baala waaga baantannaseeti xaa geeshsha iillitinnohu. Suffannohuno waaga baattannose oosose daafiraati. Ejjeettuwa amuwinna annuwinke gede ayeerichirano aleenni gobbanke balaxinso. Ejjeetuwanke jawa waaga baatisiisinonsahu anfoonni diinnansara aleenni godowu meessiha lawanni ga’mannohu gede ledonsa noore labbanni gawajjitannonsare sharramate. Techono waaga baatisiisanni noonkehu ledonke heedhenni giddo giddoonni shitanninna shiishiishshanni nooreeti.
Ejjeettuwa reytenna madidhe ragissinonke gobba afi`nummo hedeweelchonni biifinsenna latinse oosonkera sayisa hasiissannota xawisino.
Hiitee hajo aanano hasaanbeemmoha ikara dandaanno. Ikkollanna kayinni jeefonkeha minenke sayinse diinaho aate heda gowwimma ikkino daafira diinnankera albaanni oso’lammeemmo gede assannonketa baalunku seekkine afa noonke yino.
Abebebech Maatewoos
