33ki Afriku boowe aana beeqqitino Itophiyu Biheeraawe gaamo godo’laano dandaaminsa bikkinni wo`naalsha assiturono; amandoonni mixo gumaho soorra hoogansanni lekkate kuwaase federeeshiine Itophiyu daga sa“o xa`midhino.
Itophiyu Biheeraawete gaamo kaameerooni qixxeessaanchimmanni harinsanni hee`noonni Afriku boowera assitino beeqqo lainohunni, Biheeraawe gaamo qajeelshaanchi Wubetu Abaatehunna federeeshiinete borro mini sooreessi kalaa Bahiru Xilahunihu xawishsha uytino.
Itophiyu lekkate kuwaase federeeshiine borro mini sooreessi kalaa Bahiru Xilahunihu; kaameerooni Afriku boowera waaliyootu aantino doyichora sa“ate mixo noonsata xawise; kayinni babbaxxino korkaatinni konne gumaho soorra hoogansanni Itophiyu daga sa“o xa`mi`neemmo yino. Biheeraawe gaamo qajeelshaanchi Wubetu Abaatehu isi widoonni; 33ki Afriku
boowe aana beeqqitino Itophiyu beeraawe gaamo godoo`laano “Heewotenni qeelate dandiitannore baala assitino” yino. Qajeelshaanchu Wubetu Abaatehu ledeno; heewotenni mare higate ikkikkinni gaamote sa“ate mixo noonsa gede xawisinota Itophiyu odoote owaante xawissino.
Heewotenni Itophiyu daganna irkisaano hagiirsiisanno guma borreessiisate dandiinanni wo`naalsha baala assitinota xawisinohu qajeelshaanchu; ikkollana qixxaawote yanna anjenni, godoo`laasine xawunni duume kaardenni fulansa korkaatinni hattono ikkado baxillaanchimmate godo`le assa hoogansanninna wole amadisiisantino qarrubba korkaatinni hendoommo gede dikkino yino.
Jajjabba heewubba aana godo`laanote rosichi shota ikkasi gumu aana xiiwo kalaqinotano coyi`rino.
Biheeraawete gaamo godo`laano mannimmate guunte qarrinna afi`noonnita e“ote kaayyo horonsi`ra hoogano qarru gede ka`ino. Baxxinohunni mannimmate guunte widoonni noo qarri harancho yanna giddo tidhamannoha ikka hoogasinni seeda yanna looso xa`manno yino qajeelshaanchu Wubetu.
33ki Afriku boowe beeqqonni gaamote godo`le gobbaanni ikkitinoti Itophiyu biheeraawe gaamo 2 godo`lenni qeelantinoha ikkanna mitte godo`lera kayinni taalo fulatenni 1 bixxillenniiti gobbansa higginohu
Abbebech Maatewoos
Bakkalcho Arfaasa 19/2014 M.D
