Abbebech Maatewoos
Annunna shiimu beettisi olliinsanni fulte harricho guluffe doogo hanaffanno. Annuno, “daafursannohekki gede ati harrichote aana giddi ani lekkatenni ha’reemmona” yaanno. Beetuno harricho gulufi. Boode googo hadhu gedensaanni mittu shiimu ollii widoonni tayisse sa`u.
Olluu teessaanono qubbicho kayissanni; “hoola! ma yanna daggu? Hiitto geerchu anni lekkatenni ha`ranna kuni dode duuwinokki beetti harricho gulufanno?” yitanna macciishshitunsa. Hakko olliinni fultu gedensaanni “beetto`ya macciishshittonsanni? Togoore coydhankunni ati lekkatenni ha’rittoro woyyanno” yee geerchu harricho gulufanno. Beettisi albaanni hige massaganna doogonsa suffu.
Boode yanna gedensaanni wole ollaa tayisse sa`u. Haammatu mannooti haqqichote hunda chaa`lite ofolte godo`litannore la`anni sa`u. Shiima doogo sa`e hadhu gedensaanni olluu teessaano “Hiittoo dhaggeeti tini? kuni shiimu beetti lekkatenni ha`ranna hiitto annu harricho gulufanno? Hanni maay qarri no konne qaaqqo mararoommesiro?” yite hasaabbanna macciishshinsa. Annuno alba beettisi widira hige beetto`ya hasaabbannore macciishshootto daafira ati lekkakkinni hadhanna ani callu harricho gulufa dinoe yeenna annuno beettuno harricho mitteenni guluffu.
Annunna beettu hasaabbanni doogonsano suffu. Boode yanna gedensaanni wole ollaa tayisse sa`u. Olluu teessaano mitte jawa haqqicho hunda ofolte godo`litanni no. Hasaawano iibbishidhe no. Geerchuno keere haa`rensa sai. Olluu teessaano maala`litanni la`unsa. Hiittoo dirira hee`noommo jarana? annuno beettuno tenne beebbaataame harricho mitteenni guluffe maayra shitannose hanni? baaysi bao arrishshono shitusewe yitu.
Hakko olliinni fultu gedensaanni annu beettosi togo yaanno “Beetto`ya xaano mannu yaanni noore macciishshoottona, lamunkunni lekkatenni ha`nummoro woyyanno” yite annunna beettu lekkatenni ha`ra hanaffu.
Xaa mitte jawa awukaatote haqqicho hunda gamba yite noo teessaano maala`litanni la`unsa. “Kuri hiittoo gowuulleete? hiitto tenne arrishshonni lekkatenni hodhitanno? Harrichote horo tenne saatera ikka hoogguro mamootiraati? yitanna annunna beettu macciishshitanno.
Boode doogo hodhitu gedensaanni annunna beettu mitte haqqicho hunda fooliishshidhu. Annuno beettisira togo yi:- “Beetto`ya manna baala hagiirsiisa didandaatto. Konni daafira heeshshokki dirinni kaaliiqa calla hagiirsiisate wo`naali. Kuni heeshsho rosiissinnoe rosooti. Konne rosiissammohera hasi’reeti seeda doogo hodhineemmo gede assoommohu. Xa kayinni uduunnennke gamba assine ollaanke ha`no” yiisi.
Ee! sewoote widira qaafatto woyte baalanka manna hagiirsiisa dandaattokkita huwati. Wodancha hasiisannohehu amadootto doogo kaaliiqa calla hagiirsiissannota ikkaseeti. “Sewoote woowaancho diafoommo. Ani afoommohu umbete woowaancho baalanka hagiirsiisate wo`naala ikkitinotaati. Konni daafira qaafatto woyte mannu mayyaannoekka yittanni yaaddooti. Mannu gungumanno coy`ra macca tuggooti.
Bue:- Yehiiwot gibihin qiretsi yaanno maxaafinni
Bakkalcho Arfaasa 5 / 2014
