Abbebech Maatewoos
Mittu wedellichu, yuniveristete rosaanchi piroofeeserchu rosiisaanchisi ledo gangalatu basera ofolle hasaawanno. Rosiisaanchu rosaanote giddonni iso roorse baxannohura darawote gede asseeti la“annosihu. Ofoltinowa albansaanni koattesi fushshi`re gangalatu basera kaasantino haqqenna haayisso biddi assannohu co`immate loosaasinchi no.
Rosaanchu konne co`immate loosaasincho la“anni rosiisaanchisira “Ticher! techo ateno aneno cee`mishe noonke; maayra ko`onne mancho mitore assine ikkannota la`nanni diboohaareemmo? Fushshi’rino koatte haa`ne maanxo. Koattesi hasi`re hooganno woyte hiitto bararaaqannoro ninkeno ko`o maaxamme la`nosi” yaannosi.
Rosiisaanchuno “Wedellicha Jaala`ya! mageeshsha cee`mishinkerono buxane waandanni ninke hagiidha dinonke. Ninke woxu noonkehura woxinkenni roore hagiirre afi`ra dandiineemmo; hanni suuta ikkite manchu laihekkinni marte lekkasinni fushshi`re worino koatte giddo woxe worte amo; hakkiinni maaxamme manchu ikkito la`neemmona” yiisi. Rosaanchuno rosiisaanchisi yiinosi gede suuta ikke mare manchu koatte giddo lamente lekkara lowo woxe wore higi. Hakkiinnino rosiisaanchisi ledo maaxante manchunnita ikkito harunsa hanaffu.
Manchuno loosannore guxxe iimaho uddanosi tuqqe koattesi wodhara wo`naalanno woyte koattete giddo mitirichi guuqannosi. Heeshshi yee koattesi giggishshanno woyte woxe afi`ranno. Xa manchu lowo geeshsha masi! Qooxeessasi la“anno woyte mittuno dino; wirro xaano guranna qiniitesi la`anno woyte mannu heleqqo horontanni dino.
Manchuno maa`lalatenni goowasi shafanni woxe kiisete giddo wodhi gedensaanni layinki lekkano wodhate buqqi assanno woyte xaano woxe afi`ranno; manchu diammanino! Guluchisinni guluphe goowasino gotti asse iimillitte la“anni jawa huuronni “Mooticha`ya galte`ya xissama afeeti? ate gobbaanni wolu kaa`lannoekkita affeeti? ooso`ya afooho wodhitanno tima hoogginota la`eeyti? Mooticha`ya atera galatu ajannohewe” yii.
Rosaanchuno manchunnita ikkito la“e wodaninni caacci illeteno hindiiddo gubbi. Rosiisaanchisino “wona hedootto hedonni roore xa woyyino hagiirre afi`roottota dihuluullameemmo” yiisi; rosaanchuno illetenni hindiiddo fii`ranni “Pirofeeser techo geeshsha rosiissoottoerichi baalunkunni togoo roso rosiisse`e diegennootto. Heeshsho`ya dirinni haweemmokki rosooti rosiisoottoehu. Halaalintanni angara adhatenni roore aa woyyitanno” yaatenni qolinosi.
Sidaamu maammahanni wodha ba`uro adha ba`anno yaannona; wolootaho dancharicho assatenni wodaninsa giddo danchummatenni borreessammeemmore ikka hasiissannonke. Baattote aana giggilino wixi murannohu gede ninkeno techo mannu surre giddo tunge sa`neemmorichi rosiisannoha ikka noosi.
Dancha barra!!
Bakkalcho Sadaasa 21 / 2014
