Amsaalu Felleqe
Seeda dirrara gobbaydi diinna ledo halante gobbanke diigate mixidhanni keeshshitinori juntu gaamo mixonsa gumulate wo’naaltinokki hayyo dino. Gobba tenne sayisse diinnate aate geeshsha sumiimme e’ino. Kadotennino gashshitino. Konne duucha assitanno yannara umonsa dandiite gashshitinoha kayinni di-ikkino. dhaggete diinnanke olluu gobbuwano ikkito mite mite galchimi gobbuwanna Ameerikuno wolootta gobbuwa diigganni rossinonte gede Itophiyano diiganteenna la’’ate hasattonna ajuujansa lowota ikkitinohura gobbate giddo diinanke HWHT junta soqqitanninna insa gaa’liteeti hunote assootensa gumultanni keeshshitinohu.
HWHT junti 27 dirrara gobbanke kadotenni gashshi yannara gobbate mootimma laafatenna galchimi gobbuwa soqqamaancho ikkite keeshshitino. Kuri diinna xaano hasidhannohu laafanna hasidhu gede soqqantannonna hajajantannonsa mootimma safateeti. Togoo assootensa gumulate wolqa hoogguta kayinni dubbohonna goddate maaxante gano ga’nitanni keeshshite ama gobbansa qasate ola fantu. Assootinsa baalu udulumu beetti assooteeti. Udulumu beetti amasi udula loososiiti. Juntuno ilte lossitino ama gobbasiiti miicanni. Mulqanni, shollishanni, udulanni hakkiinnino sae dhaggete diinna ledo halame diigate assoote hanafinohu.
Cancishaanchu HWHT gaamo ‘’Ameeriku soqqinohu reyo diwaajjanno’’ yinanni gede ikkitu. Tini yaatto kayinni insara bareende uytannota ikkitukkinni soqqante dagge giirate giddo ubbe bareedda olantonkenni buluulte gattinota leellishateeti. Uminsa gobba qasse diigate ka’u yannara poletiku sharro gede hanaffe gedensaanni kayinni assootinsa baalu hunonniha ikkeeti leellinohu. Korkaatuno biilloonye hasi’rate xa’mo calla ikkitoommero manna aja akkala raafatunni shaa dihasiissannonka. Jajja diigano, danqa saada raafatunni shaa, donna mulqa, giira, horote gobbaanni assa, intanni gide giira, doogga mura, caabbicho mura, rosu, fayyimmatenna woloottano amma’notenna babbaxxitino uurrinshuwa diiga qara hunote assootensa assite gumultino.
Manchi beetti sharramannohu noosihu aana lexxate hasi’rinori hee’riro ikkinninna nooha giirenna diige hunanni di-ikkino. Cancishaanchu HWHT gaamo kayinni kalaqaminsanni kakkachuulle ikkitinohura wolootu mannira, saadate jajjaho hakkiinnino sae gobbate mararooshshu dinonsa.
Konne duucha hunote assootensa gumulate ka’anno yannarano ikko gumultannano la’e ye’e yinonsahu insa giddonni dino. Korkaatuno insa ilama baalanti juntu sokko calla adhitanno gede seeda dirrara loonsoonni loosinniiti. Tini duucha huno ikkitanno woyte hakko qoqqowira hay ki’ne yee ye’e yaanno jajjabbi, budunna amma’note annuwi dino ikka? Yitanno xa’mono kaysiisannoreeti. Jajjabbu kayinni heedhenni fuggootenni noowaati; ha’rinsho’ne digaraho yitinore techo danotenni qaafo adhinoonninsa; gattinori kayinni hee’rate yite afoonsa amaxxite sammi yitino qoqqowooti.
Ikkollana tini hunote gaamonna halamaano diinna gobbanke diigate ka’e baxxinohunni Amaarunna Affaarete qoqqowira ola fante duuchu handaarinni gawajjo iillishshurono gobbansa diigantannokki gede sharrantannori danchummate hedo noonsa qansootinkenni bainore qolano hoongiro wirro gatamara dandiinannire kayinni baalunku halame gobba gowanni afamanno.
Fannoonnihu olu lamu qoqqowi aana calla di-iikino; assitoommensaro gobba wo’mante aanaati hasattonsa. Konnirano gobbate giddo afantannoti wo’manti daganke, baara wido heedhanno qansootinkenna ilamano techo kuneeti gobbankera ninke hee’noommose yite dandaaminsa garinni gobbansa ayirrinye agarsiisatenna diinu diiginoha worro gatamarate loossanni afantanno. Diigara kainohu diigamanno. Danchumma heddannorinna latisannori lattanno; lophitanno roorenkanni wolaphitanno.
Itophiya affani affinokkiri diiggara ka’urono seekkite affinoseri kayinni gatamartanninna latissanni afantanno. Itophiyu oososenni ayirritanno, wolaphitanno; diinu kayinni hasattoninna ajuujasi na’ra fulinokki daafira saalino; irraawino. Cancishaanchu HWHT bunshenna huno xawisate mitu mitu manni ‘’iltinoha qaaqqo hunte moye lossidhino’’ yaanno gede Itophiyaho ilase ikkikkinni moyese ikke keeshshino. Konniraati Itophiyu ilte lossidhino oososenni ayirrinyise agaramanna moyese ikke keeshshinohu HWHT junti waamamanni no yinannihu.
Ikkinohurano gobba diigamatenni gatisate tii’’u gaado ha’rinsanni hee’noonni yannara gobbasi baxannohu duuchunku halamanna kakkachuullu diigginore danchumma, latishshanna wolapho hasidhannori kayinni diigaminorenna bainore wirro gatamartanni gobbansa gobbanni afantanno. Kakkachuullu Diiggurono Shaqqaduullu Gatamarantanno!
Bakkalcho Sadaasa 21 / 2014
