Abbebech Maatewoos
Hala`ladda irshu baatto noosihu baatto loosi`re galino manchi kaa`laancho qaxarate hasi`re manna hoogate korkaatinni lowo geeshsha mitii`mi. Baca yanna daafuri gedensaanni jeefote afi`rinoha mitto baatto loose galino mancho togo yee xa`misi “Loosu aana jawaataho?”
Baatto loosi`re galinohu kuni manchino togo yee qolannosi “Kaajjadu xeeninna wishote giddo nafa dancha goxano goxe galeemmo!” yaanno. Manchu qolino dawaro qaxaraanchoho leella gibbusirono kaa`laancho hasi`ranni lowo geeshsha tultaawinohuranna qarraminohura jajjasi agararanna kaa`lasira yee qaxarisi.
Kaa`laanchu qaxaramihunni hanafe loososi danchu garinni gumulanno. Loosu aana tenneeti yine kullanni laanfe horontanni noosikki manchooti. Hakko mereero barrunni mitto hashsha lowo geeshsha waajjishanno xeena gananno. Wishono akkimale wishshanno. Gatu anna ikkinohu baatto loosi`re galino manchi kayinni gamba asse duu`nino gidinna lalu daafira lowo geeshsha yaadi; goxichuno giwisi.
Xeenu wishshono ayirritanninna lexxitanni dagguta baatto loosi`re galino manchi coy huluullisinosihura goxinowiinni ka“e kaa`laanchisiwa maratenni goxanosinni baqqi asse “Ka“i gobbara fullona; kuneeti xeena cumme tuganni noona hanni giduno ba“annokki gede marre mitore aanaho dimbona; lalono xeenu ganannonsakki gede giddora eessinona” yaannosi. Kaa`laanchuno “gobbara fula diagarranninke; ani goxoommo; atino holgikkira marte goxa dandaatto” yaannosi.
Togoo tumo macciishshasinni baatto loosi`re galinohu jajju anni lowo geeshsha aaraawi. Afiinni yaannori nafa baisi. Baatto loosi`re galino manchi jajjasinna jirosi haameelonna wisho adhite hadhannokki gede gatisate dode gobbara fuli. Fuli gedensoonni kayinni laino coyinni lowo geeshsha maala`li. Gidu danchu garinni diwamino; laluno hadirinsara einohura xeenunna wisho diafidhinonsa.
Hakkiinnino baatto loosi`re galino manchi loosannorichi nookkihura wirro goxate minisira higi. Xa kaa`laanchu qaxarami woyte “kaajjadu xeeninna wishote giddo nafa dancha goxano goxeemmo!” yiino coye mayyaatero danchu garinni huwatino.
Bakkalcho Sadaasa 14 / 2014
