Addisu Adoola
2021 Daymendliigete heewubba Ella bocinni higganno woyte kalqenke albisaano Atileetta Tookiyoo 2020te Olompiike qixxaawonsa buuxidhanno kaajjado heewo agarantanno. Tayxe Daymendiliige umi heewote iillo quchuma ikkatenni dhaggete umi yanna Ingilizete Geetisheedi istadeeme qixxaawo assitanni afantanno. Tenne heewo harisate Morokote Quchumi Raabaati Quchumi doo’ramasi qaanganni. Koronu korkaatinni kalqete Atileetikise assitino godo’lete bado taashsho kaiminni wolu quchumira kaayyo uynoonni.
Geetisheedi istadeeme daymendiliigete heewo Awuroppu kiironni 2010te aana safantu kawa umi yannara harisannoha ikkanna; 2021 Daymendiliige babbaxxitino badubba aana soorro assinoonni. Xaaliyaanaho Roomete hadhannoti Daymendiliigete heewo tayxe Filooreensete widira taraabbino.
Oslo hadhanno heewo Noorwete koronu korkaatinni tungoonni gargaro kaiminni Waxawaajera seeddinota anfoonni. Roomete isaadeemmera Olompiiko hadhanno heewo daanno hawadira Awuroppu boowete godo’le godo’lishiishshanno korkaatinni Daymendiliigete heewo Filooreensi taraawasinni ledote Ella eora hadhanno yinoonni barrinni mitte lamalara seeddino.
Daymendiliigete heewubba murrichinna kalqete Atileetikisete pirezidaantichi Sebastiyani Ko Daymendiliigete heewubba koronu korkaatinni diru gedensaanni higansa tayxeha heewote diro maala’lishannoha assannota coy’rino. Kunino daanno hawado hadhanno Tokiyoo 2020 Olompiikenna aananno diro Ameerikaho Origeni hadhanno kalqete Atileetikisete shaampiyoonara qixxaawote gede kaa’lannonsata kultino.
Atileetootu sai mittu dirira heewo afi’ra nafa hoogguro qixxaawo assitanni keeshshitino; ikkollana qixxaawonna heewo mitte ikka hoogasenni Daymendiliige tenne yannanni higase kalqenke Atileetootira Olompiiketenna kalqete shaampiyoonera buuxote gede ikke lowo kaayyo fanannonsa gede huwachishiishshino.
Daymendiliigete heewubba Atileetootaho babbaxxino xeertinyinni kalqete aana deerra afidhanno assatenni sae diro wo’ma afi’ra dandiitinokki woxenna baraarsha afidhanno gede kaa’lannonsa yine agarranni. Xaa geeshshi Olompiikete qixxaawonsa ma deerri aana noorono umonsa keentanno yine agarranni. Daymendiliigete qixxeessaano koronu korkaatinni xaadannonsa babbaxxino qarrinni heewo hunantenni seedde woy darga soorrite hadhanno gede sharro assansa Ko huwachishino.
2020 diri koronu Atileetikisete heewo aana kalaqino xiiwonni kainohunni heewo ronsoonni doogonni fulino garinni sae sae babbaxxitino quchummara tatta’e hadhanni keeshshansa qaanganni. Tayxe kayinni boode badubbanna heewote dargubba wirro la’ate gobbaanni mittu ikkino garinni hadhanno gede kalqete Atileetikise buuxisiissino. Sa’u dirrara rosamino gedenni Atileetootu heewisantanno xeertinyinni gamba assitanno gumi kaiminni qeelaancho ikkatenna Daymendiliigete baraarsha adhate heewisantannoha ikkanno.
Kalqete Atileetikise Daymendiliigete heewubba amandoonni bado garinni harisate mudhitinoha ikkirono koronu heewote aana iillishanno xiiwo la’nanni fultino bado aana woyyimma assate badhe higgannokkita qummi assitino. Sa’u agannarano batinye Ddaymendiliigete heewubba hadhanno Awuroppu gobba quchummara koronu noosi xiiwonna finco mulimmatenni harunsatenni heewubbate doorsha hassanni keeshshitinota tuqu xaadooshshira iillishshino mashalaqqenni xawisino. Konninnino kalqete Atileetootira injiinonna yannate fayyimmate yaaddo garinni fayyimmase agarantino heewo qixxaabbino gede xawissino.
Umikki Daymendiliigete heewo Geetisheedi Ella bocinni hadhu gedensaanni ontu barri badooshshinni Kuytaarira qara quchuma ikkino Doha layinki heewo ha’rissanno. Doha konni albaanni umi Daymendiliige iillo quchuma ikkase anfoonni. Xaaliyaanete Filoorensi awuroppu kiironni Maaja aganira hanaffe hadhanno callicho Daymendiliigete heewo ha’rissanna, Oslo, Istokiholeemi, Monaakonna Lendene Maaja uminni kayisse babbaxxitino barrubbate badooshshinni heewo ha’rissanno. Shangay, Yujini, Luzaninna Paariisi Maaja bocunni hanaffe heewo ha’rissanna Biraaziillenna Zurike jeefote heewubba Awuroppu kiironni Wocawaaro eonni ha’rissanno gede buuxate dandiinoonni.
Bakkalchoo Dotteessa 14/ 2013
