Daannichonna Woshicho taalo godobbu. Sasu agani gedensanni Woshicho lee woshsha qaltu. Daannicho qaltukkinni xaano Woshicho wirro godobbu. Honsikki aganirano wole batinye Woshsha qalu. Godowate amanyootino sufi. Woshichono sasu agani badooshshinni qalase suffu.
Tonaasettikki aganira Woshicho xa`mo amadde daannichonniwa shiqqu. “Godowinni noottata buuxootta kayinni?
xa godowikki giddo mitiri no? korkaatuno aninna ati taalo godomboommo yinoommonkanni; kuneeti ani tonaaleewu ale Woshsha qaloomma. Xa tenne yannara gamu lophite jawa woshsha ikkitino; ati kayinni xaano godowinni noomma yaatta. Ikkanni noo coy maatilla isi?” yite xa`mitu.
Daannichono qoltannoti “Ani huwatattaera hasi`reemmahu mittu coy no; godowi`ya giddo amadoommahu woshsha ikkikkinni daannichoho. Ani lamu diri giddo mitto callaati qaleemmahu. Qaleemmahu kayinni shota saada dikkino; qaaqqi`ya kaxxanno woyte baatto milli yitanno. Qaaqqi`ya doogo tayse sa“anno woyte manchu beetti uurre maala`lanni la“annosi. Isi millisanno woyte duuchunku coy huxiranno. Ane qaaqqi kalaqamunnita illacha adhanno” yituse.
Sokka:- Wolootu xiqqeessuwate giddo coyinsa soorraminoha hattono seynonsaha lawanno`ne woyte yortinoonnite; ammana`ne hanni hunne, horontannino hexxo mudhitinoonnite; korkaatuno atehuno ilamanno yanna daggannona. Yanna keeshshiturono barrisinni woyyinorichi atewa daasi gattannokkite. Barrisinni ikkanno coy manna baala maala`lisannonnaha ikkanno. coyikki keeshshinohu woyyinoha ikkinohuraatina ewelira ikkino coy anera mayra keeshshino yitanni gunguntooti. Cince agadhannoha kaajjado mancho ikki. Dancha barra!!
Bakkalcho Bocaasa 16 / 2014
