Abbebech Maatewoos
Mitte lowo geeshsha hudidhino basu mitte suuqenni maala moortu. Konne assootese lainohu mittu Woshichu noonka. Kuni Woshichi taalo beeha giwittaero sayse eemmohe yiise. Basuno beeha hasidhinokkihura giwansho hanaffu. Tenne giwanshonni hiikkuno qeela didandiino. Te giddo maalu fooli woshsheennase qooxeessunni dagginota mitte yeedaalcho woshshidhe araarsitansara xa`midhuse.
Yeedaalcho “Giwantinankunni maala taalo beeqqe” yitannota shota amaale kultannonsa. Amaalesenni lamunku sumuu yitinohura Basurricho konne maala lamewa murte Woshichoho beekku. Ikkollana Woshichu uynoonnie maali shiimaholla yee hedatenni
giwansho tini qiiddannokki gede assi. Konni korkaatinni Yeedaalcho maalu bikka ani biddi asseemma yaatenni Basu qeechi aaninni hoddi assite murte egemmatenni Woshicho hagiirsiisatenna biddi assate wo`naaltu.
Xa kayinni Basurricho ise qeechi ajinohura “Woshichu qeechi bati`rino” yaatenni iseno hanqite gobba guddu. Xaano Yeedaalcho Basu hagiirsiisate yaanno korkaatinni Woshichu qeechi aaninni jawa maala murte egemmitu. Xaano Woshichu wirro isi maali ajinota la“e Basurrichote maali bati`rino; hakkiinni Yeedaalchono taashshate yite kawi ka`iinni mutre liqi`mi assitanna insano mimmitunniha la“anni anehu ajino isehu batirino yaamantanna Yeedaalcho lamunku maala itte guddu. Basurrichonna Woshichuno mulla anganni gattu yinanni.
Sokka:- Giwamme duuchankare hoongam montenni sumuu yine bocore afi`ranna mitteenni hee`ra woyyitannonke.
Bakkalcho Bocaasa 16 / 2014
