Mitte yannara mittu anni ilinnoha beetto “Kai roso rosi, soorrammi, milli milli yii, ha`ri qaafi” yaanno woyte beettuno qolannoti “Anna`ya roso roseemmona kayinnilla maa itanni roso” yee xa`mita, annu “Techo geeshsha maa ittanni macciweelitoya?” yiinosi yinanni.
wodanchi seeda yannara mitto bayicho garinno way foole abbanno! Atino foole abbite moolte ba“attokki gede umokki agari, milli milli yii, bashsho dhaggekinni mittu bayichi aana goxxooti, maxxicha ola hoongiro diqasanno woy digannano, dagunchuno shorra hoogiro diamadanno.
Meessaneeto soorrine tenne maala`lisanno kalqe aana sumuu yite hee`rate hedatto woyte umo ateti soorramate hassatto duuchunku coy ale hasiisanno. Wodanchi, basu yemakko amaddanno gede yee xawanno haqqicho wirssannosehu dino. Hudiissannose daafira tunsote giddono ikkiro sharrante yemakko amadde saga`la noose. Hatto assa hoogguro minu minu holggira raatawanna xinqira ikkanno loosise. Manchu beettino hattoontilla umosi soorre suwashshu garinni heda hoogiro bero dhagge giddo woy ga`a halcho giddo hee“rannoha ikkiro kisaaraho, heedhe reyitanno mannoota hiinaasanna wolootu hedo giddo meesaneete maaxa dagganno.
Atino seekkara hasiratto hedo heedhuhero hattenne hedo ayirrisi, baxi, wodanninnino hasi`ri. Wodanchi, hasiratto coy hasiratto bikkinni jawaho, xaano seekkite wodancha noohe; techo kalqenke aana noori jajjabba leeltino gumma duuchanti mittu manchi wodanni giddo shota hedo gediireetinkanni! Kayinni heddinnoha ayirrissenna waaga baatte hedonsa kalqe baala ayirrissanno gede assitinno.
Soorrote doogora aana ate hasatto ay coyinnino ale hasiisanno. Kunni hiitto ikkanno? Disoorramemmo yitooti. “Disoorrameemmo” “Diikkanno” yaanno laooshshi giddonni umokki fushsha hoogittoro heeshshokki giddo soorramanno coy horontanni dino. Korkaatuno tunsote giddo duuchanti kuulla kollishshote.
Lowo manni soorramikkinni hattono heddinnowa iillitukkinni reyo balaxxinnonsa, gumansa amadde bushsha e“inno. Loonsammora hendoommo coy ga`ara hanni gashshinno. Techo gumula hasiisannonke coy baala yannanke garunni horonsiratenni gumaamma ikkinno. Manchi beetti tenne kalqe aana hegerera dihee`ranno, mamootenna hiitto garinni reyannorono diafinno. Barru soodanno kiiro haaro coy kalaqatenna gumamma ikkate su`naado looso loonso.
Bakkalchoo Dotteessa 14/ 2013
