Maganu shooshanqesinni xaa geeshsha baarigaara hole gobba halashshe worino’’e; anino xaa geeshsha Maganu shooshanqenni gashshoommo. Konni ka`a reyummorono reyo baalunkura gattannokkita ikkitinohura didadilleemmo. Maganuno disaalfachishinoe; albbillichono saalfachishannoe yee dihuluullameemmo. Xaano gobba hunannohu; amma`no soorrirannohu alba maganu murinonke baara sae dayno. Anino gobba`ya saada goonfe, mannu daafuro lae xaa geeshsha sammi yuummosita sa’’anni Awalu gede baatto u`ma hanafino. Xa kayinni Maganu kaa`lonni gobba`ya sayse dieemmo. Gobba`ya manna konni albaanni miicoommoha dilawannoe. Atino xaa geeshsha dihanqisoottoe. Wolqa noohehu wolqakkinni kaa`lie. Wolqa noohekkihu oosokkira, galtekkira, amma’nokkira yite dadillikkinni kaa`lie. Bunshe loossanni gatoottohu kayinni gedensa giwamattoe. Gatona diyeemmohe.
Tini dhaggenniti Dagimaawi Atse Minilikihu gaadu lallawi baalanta daganke mitte hedonni kolidda daga wolaphora balaxaancho ikkitinota Adiwu qeelle halaale assino albi annuwinketa wolaphote sharro dhagge haaroonsatenni Itophiyu daga wolaphonsara mageeshsha kakka’inore ikkansa kalqete loosunni buuxisa dandiitinoreeti.
Gaadu lallawi Itophiyu daga ayyaanu wolambinate, dagoomunna budu balchooma kaima assinoho. Itophiyu massagaano gobbatenna wolaphote hajora mageeshsha qorophitinore ikkansa loosunni leellishshinoho. Gobbate hajo luphi yitino hayyonninna wodanchanni la`annota; konnira ikkanno kaajjinonna lophino budi ayidde ikkansa leellishshinoreeti.
Itophiyu massagaano yanna yannate gobbansanni roorsidhanno billoonyino ikko heeshsho noonsakkita albi yannara Atse Yohaannisi Metemmaho, Atse Tewodiroosi Quaaraho, Atse Miniliiki Adiwaho garunni kalqete leellishshino. Kunino massagaanonketa kakkalamate sharro wolaphotenna ayimmansa kisiisa giwate dhaggenke xawishshaati.
Tini massagaanonke umonsa gobbate wolaphoranna wolambinatira kakkalo asse shiqishate kaajjado murci’raanchimma qinaabbino ilama yanna yannatenni kalaqatenni gobbanke Itophiyu xaa geeshsha wolambinatise agarame hee`ranno gede jawa wolqa ikkino. Gobba tiiu gawajjo xaaddannose woyteno massagaanchose harunsite gaaddanno wolqa olanto kalaqa dandiisinose.
Techono konni dirinninna tenne ilamanni ikkanni noorichi tenne dhaggenni sufino gafaati. Gobbate tii’’i dhaggetenni leellinokkinna egennaminokki deerrinni allaggunni danote giddora eino. Baarigaarranke olu xawira dirante qeeltankera dandiitanno wolqa noonsakkihuranna ayee woyteno konne assa dandiitannokkihura cancishaano HWHT widoonni higge sannate halchonsa adda assate noonsa wolqa baalantenni millissanni no.
Adiwu yannara assitinota Itophiyu daga wolqatenni gashshate, wolaphonsa mulqe haxo heeshshi assate bunshete hedonsa luphi yino garinni Itophiyanna Itophiyimma hunate dandiissanno sharrenni xawo wo`mitino. Sharrensano baalunku Itophiyu daga wolqanna sharrote ayimma xa`manno deerra iillitino. Dhagge loossanno daga haaro dhaggera umonsa qixxeessitarano gadachitino.
Konninni kainohunni gobba gatisatenna sufisate dhaggete yawo adhinohu Xaphoomu Ministirchi Abiy Ahmedihu konni alba baalante dagara gaadu woshshatto shiqishino. Woshshattosi harunsiteno daganke qaccetenni qaccete geeshsha luphi yitino ama gobba baxillinna dhagge loosate ayyaaninni gantannikki dhaggete sharrora olu base gaaddanni afantanno.
Konninni harunse Xaphoomu Minisitirchi Dr Abiy Ahmedihu Adiwaho qeelle assino bareedi Atse Miniliiki gede olu basera leelle massagate gaadasi xawisatenni gattannokkita daganke qeelle duduwate olu xawo ha`rino.
Harate kai woyte sokkasinni “Itophiyaho ninke gobbaanni hiikkiinnino didaanno. Itophiya yaanno su`mi qeelaanote su`maati; wolaphote malaateeti. Duhuluullameemmo; ane ilama qeelaanchu su`miranna wolaphote malaatisera agarrannise waaga baatte Itophiyanna Itophiyimma ayirrinyu borro aana culku biirenni attantanno” yee xawisino.
Addanko! Itophiyaho ninke gobbaanni ayno uurrara didandaanno. Sannate harinsho giddo kakkalote mundeenni uurritino Itophiyimma haaro dhaggete gafinni hegerera haaro qeellete duduwinni luphi yino ayirrinyinni haroonsi’nanni reekkote yanna aana hee`noommo. Layinki Adiwa xabbanno qeellenni adda assate dagate gede massagaanchinke ledo gaandoommo.
Bero Adiwaho annuwinke bayira gobbate baxillinni olu base timbiliqqe baattino kakkalonni mareekkitino xabbanno qeellenni baalante kolidda dagara wolaphote kaima ikka dandiitinonte gede; ninke oosonsa layinki Adiwa xabbanno qeellenni techo hee’ne ledatenni Afriku roduuwinke uminsa kaayyo uminsanni mudha dandiitanno haaro dhaggete fooliishsho fanneemmo.
Bakkalcho Bocaasa 16 / 2014
