Soorrote kawa gobbate mootimma massaggannoti Jireenyu paarte layinki songo “Qaalunni budu geeshsha” yaanno adawarshinni Arfaasa 23-25,2017M.D geeshsha harinsoonni. Songote goofimarchirano xaa geeshsha noo harinsho keenatenni aantanno harinshora faasho ikkannore worroonni xawishshano fushshinoonni.
Konninni, songoteno baalanti paartete miillanna massagaano ajuujate wolqanni massagante asale miccu widira soorratenna gobbate soorronna illete leellanno guma maareekkisiisate dandiisiissanno hedonna loossa qinaabbe leeltinota la’noonni.
Xawishshu leellishanno garinni; enne yannara dimokiraasete, farcotenna seera agarsiissanno uurrinshubba ayino anga worikkinni uminsanni sokkonsa fultannore assa dandiinoonnita buunxoonni. Gobbate jiro horoonsi’nanni gara woyyeessa dnadiinoonni. Dipilomaasete ragaannino ruxxi yinikkinni gobbate horonna utuwimma agarsiisate injo kalanqoonni.
Miinju ragaannino laalchonna laalchimma lossatenni gobboomu miinji lexxo maareekkisiisanno gede assa dandiinoonni. Dagoomitte hajubbannino manna illachishshino uurrinshubba ijaaratenni hurbaate beehate, hee’nanni minna gatamaratenna ijaarate labbino loossa gumulloonni. Kunino, dagoomitte kaa’lamme bude ikkate widira reekkantanni noota leellishannoho.
Kurinna labbinori xawishshunni kulloonniri haammata gumma kayinni paarte doorshu yannara dagate e’ino qaale loosunni leellishate rosicho, hiittenne loossano hanafanna gumulate bude leellishshannoreeti. Ikkollana, paartete gede mittimmate harinshonni duuchu handaari Jirreenya adda assate luphiima ajuuja amaddinota ikkase, afi’noonni guminni tashhsi yine ledote loossa lawashshi yaantenni bude ikkinoha hananfe gudate harinsho hiittenne yannarano deama dihasiissanno.
Konnira, albaanni nooha dancha rosicho horoonsi’ratenni ha’nura miinja ledatenni, qarrubbanna xe’ne tiratenni,xaaddanno jiffa kaayyote widira soorrine sa”atenni, dagate beeqqonna yawo buuxisiisate ragaanni albinni roore kaajjine loosa agarranni. Konnira kayinni, gobboomunniha duuchu handaari Jireenya buuxisiisa dandiitanno sokko gumula dandiisiisanno dhuka kalaqi’ranna murci’raanchimmatenni loosa agarranni.
Kaajjado paarte gummaame mootimmanna kaajjado gobba ijaarate dhukise luphiimaho. Konni ragaanni, sa’u sase dirra giddo loosantino loossa poletikunna tantanote loossa paarte safantu kawa harancho yanna giddo haammata loossa gumultanno gede assitino. Hettisamaano paartuwa ledono halammetenninna ayirrisamatenni Itophiyunnihu poletiku budi keeraancho ikkanno gede assatenni wolootta gobbuwarano dancha lawishsha ikka dandaannoho. Kayinnilla, xaa ikkiro kaajjado, keeraanchonna gummaame paarte ijaarate jawu mini loosi agaranno.
Ikkinohura, aantanno sase dirrarano massagaanotenna miillate dhuka kaajjishatenni woyyaabbinota hedote soorronna mixo loosunni leellishate harinsho kajjisha agarranni. Danchu akatinna amanyootinni quxantino millanna massagaano hattono uynanni sokko ikkadimmatenni fultannorenna daganna gobba agadhitanno guma maareekkisiisa dandiitannore ikka noonsa.
Hallanyunni saeno sokko garunni gumulatenna timo seyoote iillishate ragaanni uurinshubbano jawa qeecha afidhino. Ikkinohura, hananfoonniti uurrinshubbate loossate hayyo haaroonsate handaarunna deerru deerrunkunni kaajjishanna gobba hegersatenna woyyaawa dimokiraasete bude kalaqate ragaanni qeechansa fultanno gede assa hasiissanno.
Mannu wolqanna uurrinshubbate ijaarshi mitteenni ikkanno woyteno duuchu handaari Jireenyanna utuwimma kalaqanno. Konni ragaanni sagalete wowenni sa’ne utuwimma buuxisiisate dandiissiissanno ajujja adda assate gibrinnu handaarinni hananfantino loossa luphiimu garinni gumulsiisa doorshu nookki hajo ikkitinota huwata hasiissanno.
Konnira, gibrinnu, Industire, shiilo, daa”atto, dijitaale miinji latishshi ledante miinju tantano reekko abbatenni Itophiyunniha duuchu handaari Jireenya buuxisiisate dandiissiisanno garinni ollonke loosa agarranni. Gutunniha loosu bude hallanyunnino gumullanni garinni rosicho assi’ra hasiissanno.
Dagate beeqqo buuxisiisa, mootimmatenna hallanyu halamme kaajjisha, dagoomittenna miinju safote latishshuwa halashsha, hananfoonnire manna illachishshino loossa haaroonsinanni sufisiisa, qansootu hobbaatenna ayirrinye agarsiisa, xaphoomunni, hananfantinore dagoomitte latishshi loossa lophonna taalo ikino garinni horoonsi’rate timo ganate dandiinanni garinni gumula agarranni.
Gobboomu hajubba gutunni sumuu assitanno hasaawubba kaajjsiha, hasaambe sumuu yaate rosicho woyyeessate ragaani illacha tuga, mannu jiro kaajjado dhuka kalaqidhe dagoomaho hasiissanno owaantubba shooshanqetenna ammanamatenni uytanno garinni dhukanna tiia kaajjisha, gobboomu keerinna mittimma bowirtanno garinni gumula ledotenni agarranni mini loosooti.
Kurinna wolootta duuchu handaarinni afi’noonni gumma maareekkisiisate harinshonni qaalunni loosu widira, loosu rosicho kayinni bude assi’ra, harinshotenni leeltanno xe’nenna foonqe rahotenni taashhsi’ra, haarudde hedubba ledatenni xaa yannara gutu xawishsha ikkinoha loossa hananfe gudate bude hallanyunnino bude assi’ra agarranni.
Konne bude lossi’rate hajono aantanno paartete songo aana luphi yite leellitanno gede agarranni. Loossa kaajjado massagonni hananfe gumulatenna dagganno soorronna guma kaajjinshe hegersano hasiissanno.!
Bakkalcho Arfaasa 29, 2017 M.D
