Itophiyu qolchamaano Meemete mereerimunna haranchu seendilli heewubbanni gumaamma ikkansannino sa’e kalqete ayirrinyu dannubbano hiiqqaqqatenni afantanno. Meemete heewubba kiiro aja harunseno qolchamaano doogote aani heewubbanni wirro gumaamimmansa leellishshanni afantanno. Babbaxxitino yannubbara hadhanno doogote aani qolchanshubba woyyeessitannohu ayirrinyu danninna borreessiissanno rakkino saateno konnira leellishshaho. Sa’u lamala jeefora addi addi kalqete gobbubbara ispoortete maatenni jawa illacha uynoonninsa doogote aani heewubba rosaminontenni gede Itophiyu qolchamaano ayirrinyu danna woyyeessatenni ledo gumaamimmansa leellisha dandiitino.
Ferensayte Liili hadhino heewonni Itophiyaawitte Qolchamaancho Daawit Siyyumiti, kalqete ayirrinyu Danni ama ikka dandiitino. Qolchamaancho ayirrinyu danna hiiqqatenni umiseha assi’ra dandiitinohu Onte kiilomeetire seendille heewisamatenni macca afidhinoti Qolchamaancho daawit, heewotenni faffe keeshshiturono doogote aani heewubba widira albase qolte ayirrinyu danninni warri yitino. Keeniyaawitte Qolchamaancho Bitiriis Kipikoychinni amadame keeshshino seendillu ayirrinyu danna lamu lippeessinni woyyeessate dandiitino.
Kaajjado heewubba harissino doogite aani heewubbara jeefote kilo meetirenni Qolchamaancho Daawit, ranketenni kaatte fulatenni heewisamaanose harunsiisidhe eate dandiitino. Keeniiyaawitte Qolchamaancho Nooraah Jeruutoti, 14:43 ikkitino saatenni eatenni layinkita fultinoha ikkanna; wole Itophiyaawitte Qolchamaancho Meskerem Maammoti, 14:55 ikkitino saatenni sayikkita ikkite gumultino.
Labballuno hattoo heewonni Onte kume meetire daymendi liigete qeelaancho ikkinohu Qolchamaanchu Berihu Aregaawihu, qeelaancho ikkino. Berihu, hatte heewonni qeelara dandiinohu rakkino saate borreessiisatenni ikkanna; seendillunni albaanni borreessiisamino kalqete ayirrinu danninni mittu lipheessinni calla ajinoha ikkino. Berihu, eino saate 12:52 ikkite boorreessantanna; Ugaandaawichu Qolchamaanchi Hose Kippilaagaatihu, qole 13:25 ikkitino saatenni layinkiha ikkino. Kaajjado heewisamaancho ikkinohu wolu Itophiyaawichi Qolchamaanchi Yaasin Hajiimihu, Shoole lippeessubbanni gede’ne sayikki deerra amadino.
Liilli hadhino doogote aani heewo Tonne kiilomeetire heewo heewisiissinoha ikkanna, labballunni Itophiyu Qolchamaano Cimdeessa Debelehunna Adeledellewu Maammohu uminna layinkire ikkite gumultino. Seennunni Aberraashi Minsewati, shoolkita ikkatenni heewose gumultino. Lamalate jeefora ispoortete maatenni quqquxunni agarantanni keeshshitinoti kalqete qolchamaanote pilaatineemete deerri noose Niwuworkete maaratoone ikkitanna, kalqete jajjabba maaratoonete heewubba mereerinni mittete. Tenne heewo aana seendillunni layinki jawaata qolchamaancho ikkinohu jannu Qananiisi Beqqelehu beeqqaancho ikkasi harunse ispoortete maate illacha tugge harunsitanni keeshshitino. Meemi seeda fanfe hattono gobba tayissanno heewubba aana mootoo’minohu Qolchamaanchu Qananiis Beqqelehu, kalqete ayirrinyu danna hiiqqate gattino lippeessubba
Lendenete woyyeessanno gede agarrannasi kay di-ikkinosi. Konneno harunse Niwuyorkete maaratoonera wole wo’naalsha assanno yaannohu hendirono, qolchamaanchu 2:12:52 ikkitino saatenni Leekkiha ikkatenni heewo gumulino. Tenne heewo aana seennu widoonni beeqqitinoti Qolchamaancho Abaabbele Yeshaanehiti, qole 2:22:52 ikkitino saatenni eatenni sayikki deerra amaddino.
Ispeenete hadhino maccata ikkitino Ispeenete maaratoonerano seennu widoonni Itophiyu qolchamaano Mittunni Shoolu geeshsha noo deerra harunsite eatenni qeeltino. 2:23:53 ikkitino saate borreessiissinoti Taaddu Teshoometi, umita ikkitanna, Meseret Gola, Meseret Bellexenna Beqqelechi Guddeta qole Shoolu geeshsha noo deerra amadino. Poorchugaalete Qaru Quchumira hadhanno poortote maaratoonerano seennunni Itophiyu qolchamaano Mittunni Ontu geeshsha noo deerra amadatenni gumultino. Lowo geeshsha gamba yitino saatenni dodinori Qidist Alemma, Shewaareg Allene, Mootu Megersa, Feyne Gammadanna Messelech Tseggaye roorrimma amadino qolchamaanooti. Labballu ragaanni qole Asinaaqe Dubirihu Sayikkiha ikkatenni heewo gumulino.
Siwiizerilaandete assinoonni Jenevu Lemoo kiilomeetire heewora Taaddese Abiraamihu, labballunni Layinkiha ikkanna, seennunni qole Helen Beqqeleti, qeeltino. Xaaliyaanu boco maaratoone heeworano labballunni Daamxe Kuyashuhu, umiha, hattono Meseret Ingidutinna Asimereworqi Beqqeleti, seennunni uminna Layinkire ikkansa Itophiyu Atileetikisete Federeeshiine mashalaqqe leellishshanno.
Bakkalcho Bocaasa 2, 2014
