Itophiyu bareeddate gobbaati. Wodanaamma oosose huxxa ikkite goltinose, waaga baatte biifissinose; kiirre fullannikki kakkallooshinni ayirrisante heedhino gobbaati. Xeertonnihu deinkerono niro birra 24ni barshe iillitinonsa bareeddanke dhagge horontanni hanbannita dikkitino.
Mitti mittinke bareeddanke asali noonke. Techo uurrinoommohu ninkera yite barshete qaraaro gubbitino bareeddate miqichi aanaati. Muxxe ikkitinori Itophiyu ooso “Dagankera albaanni ninke balanxeemmo” yite mundeensa bushshaho, maalansa doowiroho aa hooggoommero techo barri teccho di lawannonkanni.
Aliyye olu hajajo olanto tantanantinohu mittu qooxeessinni dikkino. Amaarunna Oromo, Sidaamunna Wolayittu, Affaarenna Gaambeellu, Guraagenna Hadiyyatenni baalunku sirchinni filame gobba agarara tantanatino olantooti. Gobba`ya yee 20 dirrara minisinninna lophino qachinni badame dubboho galanni danna agaranni hee`rino. Olanto Tigrayete qoqqowiranna dagate danchummate gobbaanni bushshe di egentino. Diinu daanno woyte sharramanno, wixu iillanno woyte midanno, dagoomittete assootubba aana beeqqannonkanni. Mundeesinninna hunkiisinni baatino danchummara tumotenni cancishaanote gaamo HWHT winni adhinohu finqilate.
Itophiya horrate daggino diinna cancishaano gaamo gede qara olu safonke ganatenni dihanaffino. Qara qara mekkonninoota shaatenninna jajjabba olu uduunnenke mulqite di ka’ino. Olu qullaawi hee`ra hoogirono kakkachimmateno deerru noosi. Cancishaanote gaamo gede Itophiyu aana kakkachinohu dino. Birra 24nni olantote aana finqilate jaddo iillitunsa woyte reytino bareedda Itophiyu gobba baalantenni filantinore ikkansanni gumulloonninsa barshe Itophiyu aana gumulantino barsheeti.
Cancishaanote gaamo aliyye olantote hajajo aana iillitino gawajjo olu uduunne moorate calla assinoonnita shota gawajjo dikkitino. Sharretenni qixxeessinoonninna bunshetenni wo`minoha ikkasi baxxinoha assannosi. Umisire gatise woloota kayinni goxxinowa shaatenni sa“e reeshshinsa aaninni uddano mulqe gotu sagale ikkitanno gede asse mulloota xawoho hunino. Togo assanno cancishaanote gaamo hende lamete. Umihu olanto saalu siqqonni qorchishantanni mooraalensa ganantanno gede assatenna dhuka hoogate macciishshame macciishshantasirati. Layinkihu olanto insa insaneetiwa mimmito ammantannokkinna “Bushanna dancha mitteenni beeqqitino jaalla`yanni togoo fokko gumulantuero ga`ana?” yite huluullantanno gede assate hendeetinkanni. Ikkollana olanto kayinni agarroonni gede dikkitino.
Roduuwisi mundee mullawa lolahase mararsitinosi olanto rohotenni umosi tantanatenni sase lamala giddo cancishaanote gaamo uurrissino wolqa hallallate widira fincantanno gede assa dandiino. Gaamonnita qara massagaano batinye amade seeraho shiqishino. Gumulantinosi finqila rabbisiratenni ikkikkinni seera agarsiisate amanyoote harunsatenni gumulanni noonkanni. Olu giddo seeru wodho ayirrisa shota dikkitino. Olantonke sa“i mittu diri giddo cancishaanote gaamo ledo baca ola assitanni jawa waaga baatino. Olu hoshshosira bareendetenni qasamanni ama gobbasira kakkalamino. Gobbasiranna dagate noosi halamme coyi`ratenni ikkikkinni loosunni leellishino. Xaano boonna bobbooddate sharramanni no.
Techo cancishaanote gaamo uynoonnisita bee`ote yanna kaayyote gede horonsi`ratenni roore qeellete gede adhitino. Amaarunna Affaarete qoqqowira heedhanno daganke aana barshete siqqo tuginonsa. Hunosi halamaanchi sheneno Oromote qoqqowira Welleggu qooxeessira addi addi jaddo iillishanni Itophiyanna Itophiyu daga fooliishsho ho`lanni no. wolootuno hunote wolquwa giddoyidinnino gobbayidinnino riqiwaanonsa qineessite
Bakkalcho Birra 25, 2014 M.D
