Wedellittenna aamamooshshunniti Itophiyu Atileetitte Letesenbet Gideyiti dhaggeeffachishshanno qeellesenni kalqe maala`lisa suffino. Seedu xeertinyinni mootitte Xuruneshi Dibaabitenni 12 dirrara aleenni amadante keeshshitino 5te kume meetire kalqete qeelle diroho albaanni Vaalensiyaho qeelatenni dandiinannikkita labbanno sewo guggu`litinoti Letesenbeti; heewote dirira ammanate ayirranno wole qeelle borreessiisatenniti guddinohu. Kunino Riyo 2016 olompiikera dhaggeeffachishshanno Itophiyu Atileetitte Almaaz Ayyaanati woyyeessitino 10 kumi meetire Itophiyu ilama ikkitinoti Neezerlaandete Atileetitte Siifaan Haseninni sa”i dirira qeelatenni 28 saate wo`mikkinni Letesenbeti Itophiyu olompiikete filo heewora Hengilote umiseha assitino jawa sewooti.
Lamente jajjabba kalqete qeellera Tookiyo 2020 olompiikera hadhinoti Letesenbeti jawiidi ispoortete barera 10 kume meetirenni Itophiya riqibbe agartino culka afi`ra hooggurono nahaasete meedaaliyinni qeeltinoti qaangannite. Kuni gumino agartinokkiha ikkasinni koffi yitinonka. Letesenbeti Olompiiketenni agartino Culka hoogasenni macciishshameennase wi`liturono; ga`ano wole barraatina sa`u agannara kaajjite loosse Olompiikete gaabbose wole kalqete qeellenni afi’ra dandiitino.
Letesenbeti olompiikete gedensaanni umi yannara sa`u lamalara heewisantino Vaaleensiyu bocho maaraatoone heewora qeelatenni mitto diro wo`mitinokki yanna giddo sase qeellenni mootitte ikkitino. Letesenbeti xeertinyunni umi yannara heewisanturono albita e`nanni yanna mittu xiqqeessi ale woyyeessatenni kalqe maala`lissino. Letesenbeti xeertinye 1:02:52 saatenni guddinoha ikkanna albi qeelle sa“i dotteessu aganira keeniyu Atileetitte Ruz Chipgetichitenni 1:04:02 ikkitino saatenni borreessinoonnitenka.
23 diriti Itophiyu Atileetitte sa`i dirira 5 kume meetirenni qeeltino Vaaleensiyu quchumira bocho maaraatoonenni wirro qeelasenni “Vaalensiu galatamo, umi bocho maaraatoone heewora e`nanni saate woyyeessa`yanni lowo geeshsha hagiidhoomma” yaatenni heewo guddu woyte coyidhino. Umi qeellenni kalqe maala`lissanno assitinose Vaaleensiyuno bocho Maaraatoonenni 63 wo`minokki xeqqeessinni heewose guddino dhaggetenni umi Atileetitte ikkitanno gede assitinose.
Letesenbeti labbaa dodisaanchunni kaa`lante wole Itophiyu Atileetitte Yaalemzerf Yehuaalawute ledo assitino dhaggeeffachishshanno heewo tenne qeellera jawa qeecha afidhino. Atileetitte Yaalemzerfi muli yannara aliyye Ayirlandera assitino bocho maaraatoone heewonni xeertinye 1:03:44 ikkitino yanna giddo kalaqete e`nanni saate woyyeessitinoha ikkirono maareekkitino
saatera afansha uynoonnikkita qaanganni. Yaalemzerfi tenne cincanni wole qeellera letesenbeti ledo dhageeffachishshanno heewo assiturono jeefote geeshsha hodha didandiitino. Ikkirono 1:03:51 ikkitino yannanni layinkita ikkite guddino saate alba Keeniyu atileetittenni borreessantino xeertinyu qeelle ledo heewisiinsanni woyte woyyinoha ikke borreessamino. Lawino garinni sayikkita ikkite guddinoti keeniyu atileetitte Sheela Chipkiruy guddino yanna 1:04:53 albi saatenni woyyitinota rakkino saate ikkitino.
Lawino garinni labballu mereero harinsoonni heewora lame hige 5te kume meetirenni kalqete shaampiyoonera qeelino Itophiyu Atileetichi Mukitaar Idiriisihura qeelanno yitanno jawa hedo uynisirono heewo 58:40 ikkitino saatenni leelkiha ikke gudino. Keeniyu heewisamaano aliidimmatenni guddino heewora Abeel Kipchumba 58:03 ikkitino saatenni umiha ikke gudatenni maareekkisiisino saate xeertinyunni dhagete leelkiha rahino atileeticha assinosi. Wolu keeniyunnihu Roonekisi Kipruto 58:09 ikkitino saatenni layinkiha ikke gudinoha ikkanna, Daanieel Maateeko 58:26 ikkitino saatenni sayikkiha ikkino.
Bakkalcho Birra 18 / 2014
