Abebech Maatewoos
2022 Kuataarete kalaqete boowe filo godo`lera Itophiyu biheeraawete gaamo Wodiidi Afriki heeewisamaano Bahir Daarete xawira xaadde godo`lituhunni lamalate gedensaanni Itophiyu hiitteeno kalqete godo`le xawisera harissannokki gede KAF sa`u lamalara agawinota anfoonnite. Konneno harunse Waaliyootu lamalate gedensaanni kalqete boowete filora Gaana wolu xawira xaadate gadachantino. Kunninnino Itophiyu lekkate kuwaase Federeeshine godo`le harissanno gobbanna xawo doore sa`u lamalara faajje assino. Tini godo`le wodiidi Afrikira Orlaado xawira hadhanno gede Itophiyu doortinota buunxoonni.
Baahir Daarete xawi KAFni agawami gedensaanni Itophiyu labballu biheeraawe gaamo kalqete boowe filote godo`le gobbate gobbaanni assate gadachamasinni, Itophiyu lekkate kuwaase Federeeshine Keniya, Zimbaabiwenna Wodiidi Afrika doortino.
Sasenti gobbuwa tenne godo`le harisate fojjonsa xawissinoha ikkanna, Zimbaabiwete Istaadeeme Zimbaabiwennitanna Itophiyu godo`le calla harissara fajjinoonnisi ikkinnina wole godo`le harisa dandiitannokkita kaafi buuxisiisasinni harinsikkinni gatino.
Keeniyu fajjose xawissinoha ikkirono Itophiyu biheeraawe gaamo Zimbaabiwe jeefote gaamote filo godo`le assate haransa gattannokkihura mittu horophilinni ha`ratenna aja fulonni tenne godo`le Wodiidi Afrikira assate gumulino. Ikkinohurano godo`le FIFA injeessino barrira Wodiidi Afriki Orlaado xawira assate Wodiidi Afriki lekkate kuwaase federeeshine ledo sumuu yino.
Itophiyu Isteedeemubba godo`le harissannokki gede agawamansa albano agarranni hee`noonnite ikkinninna hedeweelcho daggino gumulo ikkitinokkita anfoonni. Addis zemenino aganaho albaanni tini gumulo sa`ara dandiitannota ogeeyye hasaawise hala`lado duduwo loosino. Hatto ikkeno isteedeemubbate agawama baxxinohunnino tenne yannara ikkasi gawajjosinni horosi roortara dandiitannota babbaxxitino hedo ka`anno.
Qarunni KAF agawo tenne yannara tugasi biheeraawe gaamora noo horo gotti yiinonna dancha hedeweelcho kalaqinoha ikkasi kullanni. Waaliyootu kalqete boowe filora assitanno hodho Wodiidi Afriku godo`le gumi gedensaanni gawalosi afama harunse gattino godo`le xawisira assasi kalaqanno coy dino. Agawo Wodiidi Afriku godo`lera albaanni sa`inoha ikkironna waaliyootuno kalqete boowe filora hexxo heedheemmensaro xawu horaameeyyimma ragaanni gawajjantannonkanni. Tini agawo waaliyootu Afriku boowera sa“ansara albaanni ikkiturono waaliyootu settu diri gedensaanni 2022 Kaameeruni Afriku boowera sa`u woyte xawinsara gamba assidhinota honse bixxiluwa diafidhannonka.
Waaliyootu sasu agani gedensaanni Afriku boowera beeqqaasine ikkansanni qajeelsaanchu Wubetu Abaate kaajjadonna heewisamaancho gaamo uurrisate mixo noosi. Itophiyu isteedeemubba waaliyootu kalqete boowe filote godo`lensa jeefissukkinni agawamansa qajeelsaanchu xawinsa gobbaanni gattino godo`le dhukansa keenate woy mittimmate godo`le gede horonsidhara dandiitanno kaayya kalaqino.
Qajeelsaanchu Wubetu Abaate gaamosi kaajjishate xawinsara batinye mittimmate godo`le assirono xawinsara gobbaanni mittimmate godo`le assate xaaddanno mitiimmuwa tenne hedeweelchonni taashshara dandaanno. Kunino xawinsa gobbaanni mittimmate godo`le assate noo mitiimuwanna ledote fulo kalqete boowe filote godo`lubbara kiisa dandiinanni kaayya kalaqqannota ikkanno.
Wole widoonni isteedeemubbate agawama Itophiyu qoqqowubbate ijaarsitanni afantanno isteedeemubba islaanchimmanna badhera gatissinose qarrubba taashidhara dancha hedeweelcho kalaqinotano ammannoonni. Qoqqowubbano ikkito Federaalete mootimma ijaarsitanni afantannonna bocunni jeeffino isteedeemubbara huxxa uurrisatenninna “Kalqoomitte isteedeeme” yine woshshatenni sa“eno haammata wo`ma hasiissannonsa hajubba nootano rosicho aannoho.
Baxxinohunnino ijaarsinanni hee`noonni isteedeemubba babbaxxitino ispoorte harinsanninna olompiikete hasiissannore wonshitinoreeti yine batinye woxe fushshatenni sa“e lekkate kuwaase hasidhanno godo`lete xawo calla islaanchimma agare shiima fulonni loosantanno gede assa wole doorsha ikkannotano hedonsa uytannori coyidhanno. Ijaarsinanni hee`noonni isteedeemubbano ikkituro batinye woxe fushshinoonnire ikkansanni jawa coye loose shiimmaada coyibbara illacha aa hooga mageeshshi waaga baatisiisannorono Kaafete agawo rosiisaanchote.
Bakkalcho Birra 18 / 2014
