Qiddist Gezaheny
Gobbaydinna giddoydi hunaano wolquwa sharrete xiiwo ille fushshite Itophiyu aana danqarantino. Gobbankera gobbaydino ikko giddoydi xiiwo batidhinose. Gobbaydi wolquwa giddoydirira; giddoydiri gobbaydirira hale ikkansa sharre halaali xawo fulanni afamanno. Tini wolquwa daddalunni, investimentetenninna kalqetenna Afrikaho noonsa macciishshammenni, wolaphotenna wolambinatu xawishsha assine la’nanni gobbanke aana iillishshanni noo xiiwo daganketa ga’a hexxo tunsiisate sokko amaddinoti xawo ikkitunkunni hosse galtino.
Baalunkuri aleenni baxxitinote; kalqoomu deerri massagonni kalqete keeraanchimmara loossanno yite batinyootu hexxo assidhannoti halantino mangistuwa uurrinsha gattukkinni tenne anga wodhansa gumulsiisaancho ikkase lowohunni huluullissannota ikkitino. Uurrinsha eessannoseri nookkiha gobbate giddoydi hajo ikkitino hajubba aana uurritino illachanna gashshitanno seeranna amanyoote mitiinsanno garinni Tonne higge gambooshsheho woshshitino. Awuroppu mittimmano togonni addi addi bare qixxeessatenni xiiwo kalaqate hala’ladunni loossanni afantanno.
Konni aleenni Jo Baydeni gashshooti xawo ikkitino doogonna kalqe iillishanno harinshonni kalqoomu seerinna wodho gobbaanni ikkino garinni gobbanke aana xawo ikkino garinni anga wodhanni afamanno. Tini wolquwa babbaxxitinore tuqu xaadooshshuwanna yannaasincho mashalaqqe iillinshanni Teknolooje horonsi’ratenni sorote mashalaqqe hala’ladunni fincatenni luphiima xiiwo gobbanke aana iillishshanni afantanno. dagoomittete qoolla raaqatenni, ragiweelo doogonni tiro aatenni, kolishsho Piroppogaanda kalaqatenninna fincate loosira lowohunni bobbakkino.
Kuni assootinsa gobba hanaffino soorro gufisate; gobbate kalaqaminoha meessinni ammanate ayyaana shaatenna jireenyu daafira kalanqoonni baqqeenyi aana waa dunate illacha amadinoho. Ledotenni daganke babbadatenni kiphote widira massatenna gobba diigate sokko amaxxinoho. Tini wolquwa cancishaano HWHTnna Shene hattono wolootu soqqamaanonsa gobbanke aana iillishshanni nooha hunote assoote jawaachishshanninna baxxe fajjite irkissanni noo akati xawo ikke leella hanafinkunni gale hosino.
Babbaxxitino gobbate qooxeessubbara addi addi yannara qarra kalaqqanni gobboomu ga’labbo huntanni noore cancishaano wolquwa irkisate halaali techo hananfoonniha ikka hoogirono xa iillino deerri kayinni huluullisannoha ikkanni dayno. Tini wolquwa gobba diigate, eeggose ittannota laafanna soqqamaancho mootimma kalaqate loossanni afantanno.
Tini wolquwa gobbankera iillishshanni noo xiiwonna xiiwo kalaqqara dandiitanno dano ledo amadisiinse assootensa xunsine la’’a hasiissanno. Noo halaale baalanti dagoomu bissa huwattanno gede assa hasiissanno. Daganke mitiimmate huluullisaanchimma daafira xaa geeshsha dihuwattino yitanno ammana dino’’e. ikkollana tenne wolquwa sharre daganna gobba akkimale dano aana tuggara dandiitannota garunni dagate egensiisa jawa illacha hasidhanno hajooti.
Itophiyu Afrikaho baxxinohunni Soojjaati Afrikira nooseha dancha su’manna macciishshama hunate, loossinonna loossanni nooha dancha looso busheessate, miinjunni laafisatenna qarra kalaqate assoote dagankera barru barrunkunni egensiisa, sharre galchate qixxaawonsa gedensiisa hasiissanno.
Tini yanna Itophiyu daga wole yannanni aleenni seekkine wodanchineemmo gede gadachammeemmo yannaati. Wolaphonke mundeetenni, miqqatenni, kakkalotenni afi’noommote. Lowo kakkalonni afi’noommoo wolaphonke sufisiisate agarranninkere baalare ilamate gede fulate umonke qixxeessa hasiissannonke. Tenne Almaazetenna muxxetenni ayirritinotanna riqimbannikki wolaphonke shiimaaddurinni sayinse uyneemmokkita xiiwo kalaqqannorino ikkito insa soqqamaano affanno gede assa hasiissanno.
Albi annuwanke gede mittimmatenni uurrine xiiwo wolaphonkenninna wolambinatinkenni diroorannonke yinammonsara hasiisanno. Mitte huuronni hiittoo garinnino ikkiro wolaphonke sayinse di uyneemmo yinammora; huuronke gotti assine macciishshiinshammora hasiisanno. Gobbate hajo aana yekkeerammeemmokkirenna gobbanke sayinse uyneemmokkire ikkankeno afuunni aleenni loosunni leellisha, giddoydi soqqamaano widoonni ayirrinyinkenna wolambinatinke aana iilliinshanni xiiwo halantino cigilenni galchate qinaambe loosa agarantannonke.
Bakkalcho Birra 18 / 2014
