Hexxote;di mixote! Umbekki hexxitannori sewokki la”anno” yaanno maammaashshu. 16kihu Ameeriku Pirezidaantichi Abirahaami Linken togo yaanno:- “Umbekki hexxitannop baalira loose sewokki leellishi” yaatenni amaalanno.
Hexxo hexxo calla ikkite gattanno gede diinu hedino hedo wo’mitannokki gede kaphunni dudumbe bushare hexxinisihu kaajjillesi leellisha doorshu nookki doogooti. Diinahono saalaho.
Olu fullahaano kaphu duduwi mitto olu uduunne ikkinota ammantanno. Isonninni mashalaqqe kullanninsa wote “Mashalaqqe di naandanni; diino minshanni” yitanno. Ikkinohurano waajju keedisu kaphi xawoho leellanna coyinanniri cori’rihu kaphaancho ikkinota afate kiilaanchunniwa hara di hasiissanno. Tenne baala mammaashshunninna masalotenni guwurse kayisoommo korkaati sa”e sa”e Tigirayete tuqu xaadooshshira fule waajjo keedisa kapho coyi’ranno HWHT afuu busuli Geetaacho Raddihu kaphi amandannirenna yinannire hawisannoha ikkasinniiti.
Sai oyimbarra arrawisi reyaannokki Geetaacho tuqu xaadooshshira fule “Darge 17 diro wo’ma qasantanni keeshshite ba”ate lamala gate heedheenna “sa’’I” yaanno lallawa lallabbino” yaanno. Lalabbuhunni mitte lamala giddo darge qeelantinotanna Woyyaane Addis Ababa e’inota kayisinohu kaphaanchu; Dr.Abiyi settu again giddo HWHT qasate “sa’e” yaanno lallawa sayisasi ba”ate lamala gattinosita leellishanno dargete qeelamanni shallangiro yaanni waajjo keedisa kapho kaphanni afamannoti maalalete.
Kaphu harricho di hogowanno yaanno Sidaamu maammaahanni. Manchu xawoho kaphinota biixate mitte lamala giddo Itophiyu Ayyerete wolqa jajjabba Cancishaanchu HWHT olu uduunni mereershanna qajeelshu base seyino garinninna mixote garinni gante buko qoltanno wote mayira gargadha hoogi yitannotino naqaashete.
Konni albaannino Itophiyu Ayyerete wolqa Tigirayete Qoqqowo ganate wo’naalturo balaxxe affanno Raadaare qansoommo yino. Ikkollana hittino di loossino. Reyitino ille haraqeessu di afanno yinannintee gede settu again albaanni reyino TPLF Cancishaano gaamo xaano hee’noommo yaate kaphunni manna baragissanni afantanno ikkollana coyi di hattooti.
Settu again albaanni HWHT Paaret safaancho ikkinohu Sibihaati naggihu xooqe keeshshino dubbinni Itophiyu Olantonni amadame anga uyi yannara yino yaatto Geetaacho di macciishshino lawinoe; Sibaati togo yino; “TPLF reyitunkunni keeshshitino; xa assitinanni heedhinoonnihu TPLF madaarshi amanyooteeti” yaanni coyi’rinoti qaangannite.
Itophiyu daga kaphu duduwinni hembeelama di hasiissanno. Hembeelammanni yanna sa’ino. Kaphunni diigantanno gobba dino. Konne buuxisate Aliyyenni wodiidi geeshsha,soojjaatinni galchimi geeshsha timbiliqqe Itophiya gatisate gaadeemmoyite gaadu daga lubbotenni noo naqaasheeti.
Kaphu kaphoho! Kaphu gobba diigate wo’naalanno ikkinniina daga baqqi yituro halaalu siiwo shaaltinoti qeeltanno. Xaano ikkiro kaphonna halaale bando. Kaphunni hembeelantanno daga dino. Mitu mitu juntu 27 diri giddo qajeele dagate giddo surkino soqqamaano xaano hoogginokkita huwatatenni kaphaanote duuninni fulle halaalu noowa qoteho uurrino. Lukkichu buuda fushshi,bootu qali yitannori shiima halaale amadde kaphu duduwinni daga hembeelsitanno bissara base uyinoonke. Kaphu duduwinni diigantanno gobba dinona halaalu siiwo cu’midhine Itophiya gatisate qeecha’ne fulle. Kaphu duduwinni Itophiyu diigamannokkita diinahono kulle!
Bakkalcho Birra 18 / 2014
