Abrahaam Saamueel
Addis Ababa:- Kooviidi fayya taraawo amadamate deerri woy lexxo Sidaamu Qoqqowiranna Dire-Daawu Quchumi Gashshootira taraawosi lexxitinota qooxeessunniti fayyimmate uurrinshubba egensiissino.
Sidaamu Qoqqowi Dagoomittete Fayyimma Instituute Qaru Dayrektoreetichi Dr Maatte Mangashihu xawisino garinni, fayyimmate uurrinsha dagganno dhiwamaano aana assinoonni buuxonni leellishanno gumi garinni Arfaasu aganira albaanni taraawote finco 7.6 xibbuni ikkinota kule, xa kaayinni 12.3 xibbunni luphi yitinota xawisino.
Baxxinohunni Amajje bocu yannanni kaayse dagate reqeccimma lexxitanni daggino; Konni kaiminni qoqqowaho Dotteessa 9/ 2013 M.Diri geeshsha 62 kumi 944 mannira assinoonni buuxonni 7 kumi 723 manni Kooviidi-19 fayyanni amadaminota buunxoonni yiino.
Dr Maatte Mangashihu xawishshi garinni, Koovidi gargarate worroonni wodho agadhate widoonni mittu kumi weddellira, amma`note uurinshubbara, Iddirete massagaanora, ispoortete dagara, ga`labote bissaranna wolootahono fayyimmate handaari widoonni huwanyo afidhanno gede assinoonniha ikkirono konne halaale amadde qorophitara di-dandiitino.
Kooviidi-19 taraawo garga’rate lallanboonnihu lallawu yanna gooffeenna sunfe barru baala assinoonni buuxonni vayresetenni amadantannoti dagate kiiro ajjanni dagguta dagatenna la`anno biissa aana lowo deamme kalaqeenna xaa yannara tenne fayya finco lexxitanni ha`rate korkaata ikkino yiino.
Tenne deamme ti’rate Qoqqowu Pirezidaantichinni massagantino qorqorshanna haruunso assitanno komite tantanne loosu giddora e`inota kulinohu Dr Maatte Mangashihu, alba Koovidira owaante uytara yine qixxeesinoonni mereersha fannanni hee`noonni; ga`labote bissano Kooviidi agadhate yine worronni wodho agadhitannokki uurrinshubba aana qaafo adhinanni hee`noonni yiino.
15 kumi fayyimmate ogeeyyeranna irko uytanno bissara dirinsa 65 ale ikkinorenna 55-64 diri geeshsha noo dagara wolu dhibbi noorira mittenni 22 kumi mannira Kooviidi-19 kittiwaate uyinoonnita egensiisino.
Dire-Daawu Quchumi gashshooti Fayyimmate Biiro Dagate xaadooshshi sooreette Dukko Sintaayyehu Deebisiti ise widoonni, quchumu gashshooti giddo Dotteessa 9 geeshsha 33 kume 377 mannira kooviidi buuxo assine 4 kumi 573 manni kooviidi fayyanni amadaminota buunxoonni yitino.
Dotteessa 3 nni kaayse 10 geeshsha tenne lamala gumi 901 manni giddo 515 kooviidi fayyanni amadaminoho. Kooviidi fayyanni amadamate lexxo xibbunni 57 ikkitinota leellishanno yitino. Reyno mannino konni garinni lexxanni dayno yitino. Sa`u lamalara calla 10 manni rewo borreessantinota egensiissino. Rooru qarri noohu kaayinni wolu dhibbi noo manni aanati; konni manni aana rewo lexxitanni daggino.
Taraawote lexxora qara korkaata ikkinohu daga vayresete taraawo gargadhate worroonni wodhonna hoolloonni loosi aana qoropho assa hoogatenni kainohunniiti yite codhinoti Dukko Sintaayyo, konne qarra ti’rate hedo cu`mishiishate looso hala`ladu garinni loonsanni hee`noonita egensiisino. Fayyimmate ogeeyye ledo mitteenni 9 kumi mannira kittiwaate uynoonnita qummi assinoonni.
Bakkalchoo Dotteessa 14/ 2013
