Addis Ababa:– Abbayi kofo daafira yekkeerantanni keeshshitino bissa gobbansa horo agarsiisate hadhino harinsho albillicho woloottahono rosicho ikkitannote yaanni Abbayi way Jiopoletiki hajubba tittiraanchinna kofote daafira yekkeeramannohu kalaa Feqiahimed Negaashi coyi’ri.
Kalaa Feqiahimed Itophiyu pireesete uurrinshara xawisanni;baxxinohunni, Wayinna Wolqate ministere loosu mininna Gobbaydi Hajo ministere tekinikete loosi poletiku loosi ledo qinaawe loosamanno gede assinoonni harinsho kaajjadu waatinni la’nannitenna yekkeero Itophiyu horo agarsiissino garinni ikkitanno gede luphiima qeecha fultino.
Abbayi kofo ijaarsha mootimmanna Itophiyu caabbichu wolqa boordeno illachunni harunsitinoha ikkanna; Itophiyu daga kayinni annimmatenni yawonsa fultanni nooha ikkasi Abbayi way daafira yekkeerantanno bissara hale ikkansa kulino.
Abbayi waynna kofote daafira hasaambinna yekkeerammi yannara so’ronna mitiimmubba dino yaa dikkino yiinohu kalaa Feqiahimed; so’ro heedhurono ranke taashshi’ratenni agarranni gumi daanno gede assinoonnita kulino.
Wole ragaanni, albillichono Itophiyu way jiro horoonsidhanno hayyo daafira kaysinohu kalaa Feqiahimed; Itophiyaho noohu way jiro bikki ikkado ikkinokkita xawisino. Boode laayyubbara Baarp Akoobonni, Abbayinna Oomo hattono Gibe Lagga qooxeessubba agurranna woloottu Itophiyu qooxeessubba way anje noonsata huwata hasiissannota qummeessino.
Konne huwatatenni Itophiyu way jirose horonsidhanno hayyo qophotenninna bikkunni ikka noosita kule; loossa baalanti kalaqamu agarooshshe illachishshinota; way bu’a agarooshshe assate illachishshinonna qinaawino garinni gumulama noonsata qummeessino.
Albillichono wolootta kofo ijaarranni harinsho lainohunni ranke gumulote iilla hasiissannotano huwachishe; qansootu way jironni horaameeyye ikkanno garinni loosa agarrannita coyi’rino.
Amsaalu Felleqe
Bakkalcho Badheessa 25, 2017 M.D
