Tittiro
Dagate mereero keere, mittimma, roduuwimmanna baxille kaajjishannohu; diru dirunkunni quqquxammanni agadhinannihu Fichee Cambalaallate ayyaani Halantino Mootimmuwa Rosu, Sayinsetenna Budu Urrinshara (UNESCO) kalqete dona ikke borreessaminkunni 10ki diro kiirsiisino.
Tayxehu Sidaamu daga haaru diru soorro Fichee Cambalaallate ayyaana Fiixaari hawarro Fichee budu harira mittimmatenni,Cambalaalla kayinni Sooreessu Gudumaalira Badheessa 18-19/2017M.D geeshsha iibbino garinni ayirrinsoonniha ikkanna; addi addi qoqqowubbanni hattono Federaaletenni dagginori mootimmate loosu massagaanonna wosinna amuraate beeqqitino.
Ayyaanu amuraati aana hasaawa assinohu Sidaamu qoqqowi pirezidaantichi Desta Ledamo coyi’ranni; “ayyaanu, rossukkinni fullakkino annuwinke yanna bikkite haaroo diro faajje assitanni ilamate sayissinoho” yiino.
Fichee Cambalaallate ayyaani giddosi baca sirnyubba amadinoha ikkasinni Sidaamu dagara sooreessa ayyaanaatino yiino Pirezidaantichu.
Ayyaanu kalqete dona ikke maareekkami kawano sa’u tonne dirrara hornyasi agadhinonna iibbino garinni ayirrisamanni daynota Qoqqowu Woga Turizimenna Ispoortete Biiro Sooreessi kalaa Jaggo Agenyehu barete aana sayisino sokkanni xawisino.
Fichee Cambalaallate ayyaana albillichono yannitte sayinsenna xiinxallotenni irkinse sufisiisate illachinshe hajo la’annonsa bissanni ledo qinaambe loonsanni hee’noonnitano hattonni.
Sidaamu daga lixxino egennonni yanna buuxxe, murtenna raga worte sannate mereero lixxino fullankenni yannate daafira egennotenni heedhino dagaati yiinohu kayinni Oromiyu qoqqowi pirezidaantichi Shimellis Abdiisiho.
Fiche Cambalaallate ayyaani Sidaamu daga lixxino egennonna fullankete gumaati yiinohu kalaa Shimellis Sidaamu daga yannate lixxino egennonna fullankete ayiddeeti yiino.
Sidaamu daga Itophiya gotti assate mitte heellicho ikkitinota xawise; Itophiyu baca mitiimma giddoonni sa’anni qeellese gumultanni jireenyu gatannokkiha ikkasi buuxisiissanni afantanno gobba ikkase coyi’rino.
Somaalete qoqqowi pirezidaantichi Kalaa Musxefe Mehammed tenne yannara saysino sokkanni; “Fichee Cambalaallate ayyaani Sidaamu daga haaru diru soorro ayyaanimmanni ledote; kiphonna gaance tiratenni araara dirrisannohonna mittimma kaajjishannoho. Somaaletenna Sidaamu daga dhaggetenni, budunni xaaddannore roduuwa dagaati” yiino.
Ayyaanu amuraate Sooreessu Gudumaalira leelle beeqqinohu Wodiidi Itophiyi qoqqowi pirezidaantichi Xilahun Kebbede tenne yannara coyi’rino garinni; “Wodiidi Itophiyi qoqqowinna Sidaami daga mittimma kaajjite suffanno”
Wodiidi Itophiyi qoqqowinna Sidaami daga budunni, dhaggetenninna tiiunnino mittimma noonsare ikkansanni, albillichono mittimmansa kaajjite suffanno yiino.
Amadisiiseno, sa’u yannara uminsaha hunote assootensa gumu’latenna dagate mereero gaance kalaqate hasidhanno gaamo millissurono dagannihu ha’nuru budinna balchoomi garinni hasaambe qarrubba tiratenni dagate mittimma sufisiisa dandiinoonnita qaagiissino.
Hawalle Sooreessu Gudumaalira keerunni xaande ayyaana gutunni ayirrinsummo yiinohu Pirezidaantichu Xilahun Kebbede; Sidaamu qoqqowi dagate budenna balchooma bowirsatenninna latishshu ragaannino maareekkisiisanni afamanno seyoo danchu lawishshi gede adhinannite yaanni coyi’rino.
Wole widoonni,Fichee Cambalaalla turizimete handaarinni heewisamaancho ikkitanno gede assa hasiissannota Turizimete Ministircho Selaamaawiti Kaasa coyidhino.
Ministircho tenne yannara sayissino sokkanni; Sidaamu qoqqowi babbaxxitino jironni kaayyaattaa’minoha ikkasinni konne ayyaanano kuri jirubba ledo qineessatenni halashsha hasiissanno.
Ayyaana turizimete handaarinni heewisamaancho ikkanno gede assa hasiissannotano huwachishshino.
Fichee Cambalaalla gobbanke kaayyaataa’mitino amammandakikkinsannikki donna giddono mittete yitinoti Ministircho; ayyaanu garunni late agarrannisi horono aa noosita huwachishshino.
Hundiri Sidaamu annuwinna amuwi ayyaana agarte saysansanni jawu galati hasiisannonsa yitino.
Ayyaanu barra assinanni sirbi, qeexaalu, intanniri budu sagalla, annuwu maasso addi xawishshaati yitanniiti ledde coyidhinohu.
IFDR Woganna Ispoortete ministere dieetitte Dukko Nefiisa Almahadi ise widoonni; “Gobbanke Itophiyu baca ha’nuru budi, dhaggenna balchomi noose. Sidaamu daga haaru diru soorro Fichee Cambalaallate ayyaanino hornyasinna donimmasi agadhe sufanno gede Ministere loosu mininke jawa yawo adhe loosanno” yitino.
Amsaalu Felleqe
Bakkalcho Badheessa 25, 2017 M.D
