Badheessa 24,2010 M.D Itophiyu su’mi marro marro macciishshamino; qansootuno rosaminokki garinni massagaanchinsa huuro macciishshate gamba yitino dhaggete barra ikke qaagamanno. “Ninke Itophiyu daga hee’neemmo woyte Itophiyu qansoota; reyineemmo woyte kayinni Itophiya ikkineemmo” yitannoti dhaggete yaatto batinye Itophiyu daga hindiddissino.
Xaphoomu ministirchi Abiy Ahimedihu (Dr) biilloonyunni umisi fajjonni ho’lino albi xaphoomu ministirchi Hayilemaariyaam Dessaalenyihu anganni faajjetenni yawo adhe sheemate e’’ino; assino hasaawinnino Itophiyu qansoota hexxotenni wonshino barraati.
Sa’u lamala dirra e’noonni qaali loosu widira soorramino; Itophiyuno jireenyu hodhishshase jawaachishidhinore ikkitino.
Afi’noonni gumma kaima assatenni “bero, techonna ga’a Itophiyu bayirreenyira!” yaanno uminni addi addi quchummara irkote dira harinsoonni.
Dirunnino bero seyoo dhaggeeffatantino; ga’a roore dancha assate sheemaatuwa haaroo’mitino.
Asoosu quchumira harinsoonni irkote diri aana Benishangul Gumuzi qoqqowi pirezidaantichi kalaa Ashadli Hasenihu xawisanni; Badheessa 24, handaaraho borreessantino soorrora safo tungoonni barraati. Soorrono qarra qeelletenni sa’anni gobboomu jireenyu hodhishsha kaajjishshe suffino yiino.
Itophiyu daga gobbansa hajora mitteenni mu’ra dandiitannohu poletiku akati kalaqaminotanna gobbate hiiqqamme dhaawinoha ikkasi kayisino.
Galchimi Itophiyi qoqqowi Wolayitta Sooddote quchumira dagate irkote diri aana afaminohu qoqqowu pirezidaantichi Xilahun Kebbedehu coyi’ranni; gobboomu soorro hendanni woyte gobbate gede noota poletiku, miinjunna dippiloomaasete hiiqqamme tirate gobboomu hedo kalaqatenna ledamate fullankenni lowo gumi borreessamino.
Qoqqowu daga soorro abbitino kaayyo huwatte sa’u lamala dirrara mootimmate noonsa halamme leellishshanni keeshshitinota xawisino.
Miinju ragaanni gobboomu dhuka horonsi’rate dandiitinokki miinju woyyeessonna haammata latishshu inisheetiivubba gumulatenni laalchimma lossa dandiinoonnita xawise; qoqqowu batinye elto afi’rinoha ikkasinni jawaante loonse kaa’lamaanchimmatenni fulanna buxima dhagge assa hasiissannota qummeessino.
Adaamaho harinsoonni diri aana sokka sayisinohu aantaanchu pirezidaantichi ba’lattonni Oromiyu qoqqowi baadiyyete kilaastere qineessaanchi Addisu Araggihu isi widoonni; Badheessa 24 Itophiyu hiiqqamme xagisatenni duuchu ragi latishshu seyoo borreessiisatenni kaa’lamaanchimmatenni fulate dandiissannota haaro latishshu fooliishsho hananfoonniha dhaggete barra ikkasi xawisino.
Barru wo’manka hanqafino dagate taalleenya, roduuwimmanna jawaata dimokraasete amanyoote gatamarate safo tungoonniha ikkasi qummeesse; tenne dirra giddo qoqqowoho haaro olluu tantano diriirsinoonnitanna baadiyyete daga woyyaabbino owaante afira hanaffino yanna ikkase egensiisino.
Soorrote gedensaanni amandoonni doogonni daga kaa’lamaanchimmatenni laalchimmate widira reekkamate jajjabba loossa gumultanni afantannota huwachishinno.
Gobboomu soorro adda ikkitinoha 7ki diro lainse dagate irkote dira harinsoonni quchumma mereerinni Neqqemte, Asosu, Adaamu, Sheggeri, Bishoftu, Jimmunna Wolayitta sooddo afantanno.
Qiddist Gezzaheny
Bakkalcho Badheessa 25, 2017 M.D
