Keere keeshshitini ooso; keerella heedhinooni? Hayya; addintanni danchaho, addintanni danchaho!! (Tenne keeru bitima Abbaabba Tesfaye Televizdiinete hulera shiqe saaysanno keereeti) tenne niwaawe nabbawannohu baalu Abbabba Tesfaye qaagginanni yee hexxo aseemmo.
Qaaqquulle; techo Abbaabba Tesfaye su`ma kaaysammoraati. Macciishitini; hayya; Ki`neno garunni seekkitine harunse. Ooso danchu amanyootinni woy akatinni lophitanno gede assatenni, rosunnino jawaata ooso ikkitanno gede jawaachishatenni hattono buqqeensa danchurinni lophitanno gede amaale rosiissate widoonni assino looso huwattinanni gedenna isi assinoha dancha looso ki`neno hassine macciishitinanni gede woy nabbabinanni gede qaagiisateeti. Yoommori garaho ooso? “Garaholla” yitinanni gede ammaneemmo.
Abbaaba Tesfaye, Itophiyu Televizdiinera Oosote Qixxaawo qixxeesaanchooti. Qaaqquullu qixxaawo lamala lamalate sanbatu soodo sa`anno daafira ooso calla ikkitukkinni jajjabbu baalu harunsanno. Baxxinohunnni, hawadi yannara sae sae rosu fa`namanno yannara oosote saaysanno qixxaawo shota gede hawantannota dikkitino. Haammatu manni buqqee giddo Abbaabba Tesfaye no.
Baxxinohunni ooso`ya; Abbabba Tesfaye rosiisanno rosi maatto, maattona masalo, maamaashshu, lawishshu hasaawinni, ososhshiishanno coyinninna haarimootenni ooso godoshishanni rosiissannonsa. Abbaabba Tesfaye aanno rosinna amaalesi wodana qoltanno.
Abbaabba Tesfaye, ooso godoshshishanno yannara horonsi`rannoti umisi hayyo noosi. Ooso ki`nena wolu manninni baxxitine egennantinanni badooshshi noo`ne? Abbaabba Tesfayera kaayinni noosi.
Abbaabba tesfaye 1916 M.Diro ilamino. Qoleno, 2009 M.Diro tenne kalqenni rewotenni baxxi. Qixxaassanno qixxaawo baala, saayisanno sokka hattono amaalanno amaale dihawantanno. Tini Abbaabba Tesfayera baxxe hawamannokki akatasiiti. Qole qixxaawo saaysanno woyte bitimaho horoonsi`ranno daafira ayno dihawanno. Techo geeshsha haammatu manni qaaganno. “Malawo malawo” yaanno coommadu hasaawisinna haariimosi techo geeshsha wodanu giddonni difultanno. Coomadu arrawisinni togo yaanno.
“ Ooso;
Techo daraaro;
Ga`a gumaati”
Tenne yaattosinni baxaminohu Abbaabba Tesfaye; qaaqquullunna jajjabbu manni macciishshesi duuwannokkihu; coommado haariimosinni egenaminoho “Ooso techo daraaro, ga`a gumaati” yee oosote aana assino danchu loosisi techo geeshsha ane maala`lisannoe. Konnira, Abbaabba Tesfaye “Oosote annaati” yinannita dagoomu suusa afi`rino.
Ooso “Dagoomu suusa” yaa mayyaatero affinoonni? Qarrantinoonte! ani kuleemmo`nena! “Dagoomu suusa” yaa loossinanni loosinninni; uytinanni dagoomittete owaantenninna wolu qeechinni daga kassi assatenni afi`nanni suusati. Ki`ne ooso kassi assatenni, rosiisatenninna amaalatenni afi`rino suusaati. Ooso`ya; manchi beetti danchu loosisinni lowo afansha adhanno. Konne egentinoonni ooso`ya? Hashshu, eewanni daga seekkite baattanno dancha afansha.
Ooso!! duuchu dani ogimma anni Abbaabba Tesfaye Sahiluha “Abbaabba Tesfaye” dagoomu suusa hiitto afi`rinnoro; maayira afi`rinoro huwattinni? Eewanni danchaho. Ki`neno albillite togoo dani suusa afi`rate maa loosa hasiissanno`nero buuxxinoonni? Hayya ooso`ya. Abbaabba Tesfaye gede togoo suusa afi`rate lophitine seekkitine dagoomu aana loosate; dagooma kassi assate; macciishitini ooso? Hayya danchate.
Maayye ooso`ya!! techo daraaro, ga`a guma; konni haaru diri roso`ne xaanni hanaffine rosi`nera illacha tuggine xiinxalla hasiissanno`ne. Annuwa`nera, rosiisaano`nera hattono dagoomaho dancha akatanna amanyoote leellishshine yinannire seekkitine macciishitine umo`nenna maate`ne koroonu vayresenni agadhatenni diru goofimarchira rosu minna cufantanno woyte rosunna fonqolu jeefeenna, taje adhitine umiha fultineenna xaandeemmo gede hexxo asseemmo. Ooso keerunni; Keerunni!!
Abrahaam Saamueel
Bakkalcho Birra 4, 2014 M.D Hamuse
