Abrahaam Saamueel
Itophiyu yannoommitte Ispoorte ledo egennaminkunni mittu sani ale ikkisirono gobbate Ispoorte lophitukkinni noowa heedhe ha`rinshose sffino. Konnirano gobbate Ispoorte lopha hoogase tntanote hajo qara korkaata ikkinnota Ispoortete ogeeyye duucha yannara kaaysanni leeltanno. Gobbate Ispoortete tantanora noo foonqenna qarra bandeenna woyyeessinanni gede lowo yannara wo`naalliha ikkirono biddissa woyeessine uullara dirrissa dandiinikkinni lowo diri saino. Sa`utta boode dirranni kawa kaayinni gobbate Ispoorte lossate guficho ikke keeshshinoha Ispoortete maabbarra tantanote biddissa woyyeessate gashshootu widoonni jawa wo`naalsha assinanni keeshshinoonni.
Gobbate deerrinni Ispoorte haaroonsate assinanni wo`naalshi giddo mitiha ikkinnohu Ispoortete maabbarra tantanate hajo sa`u yannara woyeessinanni gede babbaxitino xiinxallonna hasaawu ba`re assinoonni.
Xaphoomu Ispoortete amaale mini qole woyyeesinoonnita haaro Ispooretete maabbarra uurrinsanniha biddissa maakisanyote barra Iskay layt Hoteelera hasaawa assini gedensaanni wo`ma huuroonni gumulo assinoonni. Xaphoomu Ispoortete Amaale Mini ganbooshshi amaalete mini ganbooshshi amanyootinni shiqeenna woyyessinoonnihu gobbate deerrinni Ispoortete maabbarra uurrinsanniha biddissa EFDR Ispoortete Komishiine Komishiinerete borro mini sooreessi Kalaa Selemoonni Aliyunni shiqqenna hasaawa assinni gedensaanni wo`ma huuronni sumuu yaatenni guulloonni
Wogana Turizimete Ministeerenna Ispoortete amaale mini layinki ganbisaancho Dr Hiruuti Kaasiti EFDR Komishiine Komishiinerenna Amaalete mini Borreessaanchi Kalaa Eliyaas Shikurihu Babbaxxtino Ispoortete handaarinni Ispoortete maabbarra borreessanteenna egensiishsha uyneenna Ispoorte halashshitannonna lossitanno gede assate diriirisine hee`noonniha loosu amanyoote buunxe biddi assatenni Ispoortete maabbarra Ispoortetenni investimentenna piroomooshiinete loosi aana beeqqaano ikkatenni Ispoortete lophoranna gobbate miinjira qeechansa fultanno gede assate Ispoortete gashshooti dimokirasaawenna taalo ikkinno garinni massagamanno gede kawa ka`a yiinokki amanyoote gamaxa hasi`noonnihura kuni woyyeesinoonni biddissi fulino.
EFDR Federaalete Gashshooti Gumulaasinete bissa biiloonyenna loosonsa gumulate fulino lallawi kiiro 1097/2011 quwa 32/4/ሠ komishiinetenna Ministreetootu wodho kiiro 446/2011 quwa 11(6) xaphoomu Ispoortete amaale minira uynoonni biiloonyi kaiminni biddisu woyyaawe fulino. Biddissu gobba baalate Ispoortete maabbarrara, Paaralimpikete komiteranna Olompikete komite aana gumulo afidhanno gede qummi assinoonni.
Itophiyaho babbaxxino deerrinni Ispoortete heewonna godo`le qixaabbannoha ikkeenna, tini heewo iiladimmatenni, isilanchimmatenni, gumunninna taallimmate deerrinni xe`ne noonsata Ispoortete riiforme xiinxallo leellishino. Baxxinohunni Itophiyaho qixxeesinanni heewo isilanchimmate deerrinsa Afirikahonna kalqete deerrinni qixxeesinanni godo`le ledo xaadinsiro lowo xe`ne noota ikkitinota xiinxallotenni kulloonni. Hakkiinni sairo haaruudehonna riqibbanni hadhanno Ispoortenyootira uytanno kaayyo ajjinota ikkitinohura hasi`nanni deerrinni gumamma ikka hooggansa xiinxallo qummi assitino.
Ikkinohura riifoormete xiinxxallo amaalete hedo kaima assite gobbankera qixxaabbanno heewo deerransa agadhitonotanna Afirikahonna kalqete deerrinni qixxaabbanno heewo ledo mittonna gumaamme ikkitanno gede assate loosunni irkisa hasiissanno daafira heewote tantanonna loosu biddissi qixxaawanno gede assinoonnita anfoonni.
Konninni lede dagoomuuti Ispoortete beeqqo lossatenna halashshate dandiisissanno sanade aana hasaawa assinanni hee`noonniha ikke, sa`u Maakisanyote barra gumulo afi`rinohunna woyyeessinoonni biddissi Goboomu Ispoortete Maabari Uurrinshi haammata qarrubba ti`rannota ammanoonni.
