Itophiyu daga wayinni roore keeru duduwo goodhino;Sagaletenni roore keere hudidhino. HWHT 27 dirira laaxissanni keeshshitino qamade badheenni baca sharre amaddinotano muli barri kawa qamade sokkannonke gobbuwa Itophiyu aana noonsa laooshshinni huwatate dandiinoonni. Gafantino qamade sokkanni keeshshitino waajjuulli Itophiya qottanni keeshshitinotano xa buuxissino.
Insa qamadenna HWHT torbitenna maaffe sa’ino sirchu poletikinna gosoomitte keeraano qansooti lubbo qocci assiissino. 20 diri ale Tigirayete daga agartenna gatensa shuquntanni,kanchafare shorritanni keeshshitino Aliye hajajo olanto TPLF mittu hashshinni buluulo assitu. Hakkono di ittisantino;wixxino gosoomittenni Amaaru Qoqqowi Maykaadirunni Affaarete Qoqqowi Gaalikoomu geeshsha qante duubbinokki,miqichinsa kaajjinokkinna mundeensa ge’inokki qaaqquulle mittimmatenni shite waantu. Togoo duduwi barru baala macciishshamanna xaano techo geeshsha qaaqquullenna meento amadisiissenna shitanni poletiku qumaare godo’litanni afantanno Cancishaanchu HWHT gaamo.
TPLF badheenni umise hororanna albisaanchimma agarsiisate dodantanno Ameerikino lubbo itanno TPLF gaamo irkisse techo geeshsha Olu uduunne kaa’lote gidi giddo suuqqe soyaatenni sa’e Araaramme yitanni Itophiyu gashshootira agawo tuggara hecheemmo kaddanni afantanno.
Seeda diro TPLF qajeelaanono giddo surkante lamu billawinni ittannori nootano huwatate qaallichunniwa hara di hasiissanno. Ikkina xa Itophiyu daga keerenna jireenya goodhe soorrote gashshooti abbino kaayyo badhe higgannokki gede kawaanni Koroonu fayya;ka’aanni Juntu xiyyiti ruxxi assinsakkinni goodhino keerira yite hashshi taali geeshsha Itophiyaho keerenna jireenya abbanno; dartu odoo di macciishshiishannonke;keerunna jireenyu gobbate dirranno gede assannonke yitino mangiste doodhitino.
Tini daga doodhitinonna Qeeltino Paarte haaro Mootimma safidhanno barri Wocawaaro 24/2014 M.Dirira dayino. Konne barra Itophiyu daga goo’riite agadhitannohu roorenkanni keerunna ga’labbote hattono moorunna mussinnu anna hooganno gede assitanno mootimma gede assite hixamanyiteeti.
Ikkina,haaro safantanno Itophiyu mootimmara “ane ane” yaatenni fulle “Itophiya Itophiya” yaate mageeshsha qixxaamboonnikka?! Ee,seeda yannara ane gosa,ane sircho,ane daga yinanni keeshshinoonniti ayerano di maaxantino. Konneeti daga timbiliqqi yite sai gashshoote tiyyidhe gibbanno gede assinohu. Konnirano xa daga goo’riitino keerensa kassi assanno gashshoote hasidhanno. Ane ane yaannoha warxite tugge,Itophiya Itophiya,Daganna daga yaannoha hasidhanno. Haaroo safamanno IFDR Dagate riqiwamaano Amaale mini jawu dinyi loosi agadhannonsare ikkinota mite mite hasaawinsoommo dagoomu bissa kayissanno. Daga kayissino garinni, Itophiyaho mannu loosino mixonni kalaqantino hude no;kunino daga hudiissiinse urdete ubbanno gedenna gashshite no mangiste tiyyi’ne gimbanni gede assate hayyooti. Wole widoonni manna mannunni,sircho sirchunni,gare garetenni bande worroonni buusi mimmitu aana huluullo kalaqanni afamanno. Moorunna Mussinnu hala’lino. Halaalaancho yoo goo’noonni;halaale gorsannohunna hanaaqanno ogeessi kalaqamino. Lawisiisate latishsha diriirsinanni keeshshinoonni. Konnenna kula dandiinannikki qarra file fushshatenna gobba hursate jawu dinyi loosi noose haaro mootimma Wocawaaro 24/2014 M.Dirinni safananno.
Roorenkanni Manchi beetti keeru hee’rirooti miinji’rannohu,ile sunqi’rannohu;ce”e qaamannohu;loose mixxannohu. Xa balaxannohu keereho,ga’labbote. Keerunna ga’abbo gobbate ikkituro jireenyu ijaara fula shotate. Kalaqamunni daanno qarra kaaliiqi hoolo; Manchu beetti kalaqanno gaancenna hude gargarate haaro mootimma yee’e yito. Busha buuto heddanno baala kalqete massagaanchi kaaliiqi eemaro. Itophiya maganu maassi’ro!!!!
Wocawaaro 2014 M.D.
Bakkalcho Wocawaaro 13, 2014 M.D Hamuse
