Gashshaanninna galte mitteenni Xaaliyaanu gobba widira buubbanni heedheenna horophilu buuwisaanchi woy kaapiteenichu huuro gotti assanno maykirafoonenni mitto coye coyi’ri “Ayirraddunna ayirradda konne coye kuleemmo’ne woyte lowo geeshsha macciishamannoe; horophilunniti mitte motore diloossanno. Layinkitino uurritino, shiimu xiqqeessi gedensoonni cancanamate dano iillitannonke. Xa tini yanna cubbonke kulleemmonna maaro xa’mi’neemo yannaatina huuccidhe maaro adhe, biddi assa hasiisanno’ne coye biddi asse” yiinsa.
Kalaa Daani galtesi Elzaabeeti anga amade “Ane malawo gatona yiie lowo geeshsha ayirranno coye assoommota afootta; ninke ledo heedhannoti rodookki Samiraawiti ledo batinye yannara goxoommo. Iseno batinye higge godobbinnoha dirrissino. Xaaliyaanu gobbanni hingummoro ise ate hadhotenni shiteenna Ameerika ha`ne ise ledo mitteenni hee’nammora mixo amaddino. Hanni gatona yiie” yaannose woyte Elsaabeeti “Aguroomma gatona yoommahe, kayinni anino kuleemmaheri loosoomma cubbu no” yitu. Hanni gatona yiie, sase oosonke mereerinni lamu Yuhaannisinna Asteeri diate qaaqquulleeti ate qaaqqo Vikitooriya callaati. Ku’uri lamunku kayinni jaalikki Ermiyaasira iloomma oosooti.
“Ane malawo qaagatto mitte hige mooraano mulqituhe barra?” yitu. Kalaa Daani “Ee ane malawo qaageemmo”. Elsaabeeti qoltannoti “Mooraano mulqitannohe gede assoommati aneeti; korkaatuno labbaahu jaali’ya Aleeksi rosu mini baatooshi dinosinkanni, mulqinoonnihe woxeno isira rosu mine baantoonni. Xaaliyaanu gobbanni hingummo gedensaanni ate shiishiishate manna qaxare noomma. Ballo hanni gatona yiie” yitusi. Kalaa Daani “Maayyena gatona yoommohe” yii.
Hedeweelcho horophilu buuwisaanchi huuro gotti assanno maykirafonenni “Ki’ne addireeti kaaliiqi huuccatto’ne macciishshinno; lamenti motore garunni loosa hanaffinona keerunni fooliishi’neemmo” yii. Hodhaasine baalantinni hagiidhatenni roore sammi yitu. Ko mereero mittu hodhaasinchi hedeweelcho shootti yee kae uurre, “Buuwisaancho macciishshi, buuwisaancho fooliishshi’ra dinonke horophila cancanni, tugi, tugi yaanno woyte hodhaasine baalantinni mitte huuronni cancitanni cancani butu butu assi yitanni raartu.
