Abebech Matiwoos
Mitte yannara mitticho ceicho quuphe tuggannowinna hawadiha xeenu aganna sayissanno mine mi’nitanno baycho hasidhanni noonkanni. Hassanni hadhanno yannara lame haqquwa la’uti shiqqi yite fooliishidhanno bayicho xa’midhansara hasidhu. Umo mittichu haqqichiwa shiqqi yite, fooliishidhanno baycho hasidhinota kultusi. Haqqichuno fooliishidhanno baycho aasera hasi’rannokkita xawisise.
Ceichono umi haqqicho dawaronni aaraabbe, layinki haqqicho widira shiqqi yitu. Hakkinnino foliishidhanno bayicho hasidhinota kultuse. Layinki haqqichono hagiirrunni “Xa’mokki maayyeena yee adhoommona ane aana mine loosidhe fooliishi’ra dandaatta” yiise. Ceichono hagiidhite layinki haqqicho aana minese mi’nite biddi assitu; quupheseno tuggu, xeenuno hakkawoytenni gana hanafi. Ganannohu xeenu waajjishannoha ikkasinni kainohunni, umi haqqichi uwe baeenna haameelo adhitusi. Konne la’e ceicho “Lai kaayyokki tenneeti, anera fooliishi’reemma baycho aa giwoottohura maganu hanqe tennenni qorichihe” yitusi. Haqqichuno muushshi yaanni “keshshoommo bayichinna heeshsho’ya tayxe hawado saeemmokkitanna uweemmota afoommonkanni, atetinna qaaqqulikki heeshsho danote aana ubbannokki gede hedatenni mine loosi’ratta baycho xa’mittae woyte gimbi yuummo” yee qolise.
Ceichono fajja giwinnose korkaata huwattu gedensaanni haqqicho marartu, ise hedonni woyyaawenna xeertise lae gatisinnose daafiranna danchummasi daafira wodanise giddo ayirrissusi.
Huucci’nanni coye duuchankanni hawalle afi’ra hoongi. Korkaatuno hasi’noonniri mitu seyaanno mitu hunannoha ikkino daafira.
Heeshshonke giddo hasi’neemmo coye hoollinkeronna hakkonne hoongummoro gumaa’matenni badhera gantummo yaa dikkitino. Ayi afino huucci’noommore hooganke heeshshonke giddo danchareno ikkankera dandaanno. Konni daafira hasi’noonni coye baala afi’ra hoogano aamamooshsheho!” afi’ne ba’’atenni hoonge woyyate.
Heeshshonke billaallitanno gede assanno guficho doogonke aanninni fiine hoo’la hasiissanonke. Mittu uwa wolootano tuggannokki gede, mittu mittunku umisiranna hattono wolootaho dancha coye heda hasiissannosi!!
