Addis Ababa:- Haaru mootimmate laooshshi loosu kaayyo kalaqo barru hurbaati aleenni asse la’’annoha, jirote kalaqora kaimanna bikkaancho assinoha ikkasi Loosunna Dandoote Ministircho Muferihaat Kamiili xawissino.
Dukko Muferihaat Itophiyu pireesete uurrinsha Adaamu quchumira qixxeessitinno layinki fooliishsho 5ki ‘Itophiyu daafira’ ba’re aana viidiyootenni sayissino sokkanni; loosunna dandoote ministere uurrinsihu gedensaanni Itophiyu noose elto la’e dandoote latishsha, loosu kaayyo kalaqonna loosunna loosaasinete xaadooshshe la’anno handaarra qineessatenni ikkado guma borreessiissanni afantanno. Konnira qoteho uurrinshu gatamarsha lainohunni hala’lado looso loonsanni hee’noonni yitinno.
Kuri soorrote amadubba giddo mitte ikkitinoti loosu kaayyo kalaqo konni alba anfoommo laooshshinni soorrantinote yitinnoti dukko Muferiyaati; konni alba noo laooshshi gamunni barru hurbaate wonsha hedote giddo worinoha ikkasi kayissino.
Xa noo laooshshi kayinni konninni baxxinoha ikkasi xawissinoti Ministircho; loosu kaayyo kalaqo barru hurbaati aleenni jiro kalaqate kaimanna iillo assino laooshshe amadinoha ikkasi coyidhino.
Ministircho coyidhanni; Itophiyu hala’lado kalaqamunna mannu loosino jiro noose, tenne jiro bande ma garinni loonsummorooti gummaamma ikka dandiineemmohu yitannota gobboomu hedo amande baxxinohunni gobboomu miinji haaroonso gumulate loonsanni hee’noonni.
Wole widoonni Interpirayizootu dandootenni massagantinore ikkitanno gede loonsanni hee’noonnita xawisse; mitte mittenti loosu harinsho kalaqqannota loosu kaayyo co’o assine horonsira hasiissanno yitino.
Interpirayizootunnino mannu jiro latishshi aana illacha tunge loonsanni yitinnoti ministircho; konnira qajeelshu, tekinoloojete, womaashshunna labbeemme hajubba aana noo hekko tirate loonsanni hee’noonnita huwachishino.
Barete aana Midirooki gaamo qaru loosu gumulsiisaanchi kalaa Jemaal Ahimedi; “loosu kaayyo kalaqonni hallanyu handaari qeecha” yitanno borro shiqishinoha ikkanna konninnino Loosunna Dandoote Ministere, Yuniveristuwanna hallanyu handaari waaxotenni loosu kaayyo kalaqo aana qinaabbe loosa hasiissannonsata coyi’rino.
Midirooki gaamo 74 kumi qansootira loosu kaayyo kalaqqinota coyi’re; Itophiyaho noo looso afidhinokki daga kiiro garinni loosu kaayyo kalaqo aana illachinshe loosa hasiissannota xawisino.
Itophiyaho afantanno dureeyye tirfetenni sainohunni ilamate sa’’anno looso illacha tugge loossara hasiisanno. Dureeyyete tirfe ikka hasiissannohu loosi’ya gobbatenna dagate ma kaa’lo assino yaannoha ikka hasiissannota huwachishinno.
Itophiyu pireesete uurrinsha yannate hajubba kaima assatenni babbaxxitino hajubba aana kaimu hedo shiqishshanni hajo la’annonsa bissa hasaabbanno gede injeessatenna wodhote waaco ikkitanno hedubba ka’anno gede assatenni 19 bare qixxeessatenni batinye hajubba aana hedote dikko kalaqantanno gede loonsanni keeshshinoonniti qaangannite.
Itophiyu Pireesete uurrinsha qixxeessitinotinna loosu kaayyo kalaqo aana illachishshinoti layinki fooliishsho 5ki ‘Itophiyu daafira’ faajjete hasaawu bare Adaamu quchumira harinsoonni.
Qiddist Gezzaheny
Bakkalcho Ella 5, 2017 M.D
