Addis Ababa:- 2018 baajeetete diri xaphooma illaallishshu baajeete 1.93 Tiriiliyoone doolaare birra ikkitinota kulloonni.
Woxu ministirchi kalaa Ahimed Shide 6ki dagate riqiwamaano amaale mini 4ki diri loosu diri 35ki uurrinshu songo aana leelle 2018 baajeetete diri illaallishshu baajeete lainohunni uyino xawishshinni; 2018 baajeetete diri xaphooma illaallishshu baajeete 1,93 Tiriiliyoone birra ikkite shiqqino. Konni giddonni uurrinshu fulora 1 Tiriiliyoone 183.7 biliyoone birra, kapitaalete fulora 415.2 biliyoone birra hattono qoqqowu mootimma irkora 314.8 biliyoone birranna sufote latishshi e’’o jeefishshira 14 biliyoone birra ikkite shiqqinota qummeessino.
2018 baajeetete dirinni Federaalete mootimma gobba giddo e’’ote buenna gobbayidi kaa’looshshi xaphoomunni 1 Tiriiliyoone 510.9 biliyoone birra gamba assinanni yine hendoonni yiinohu ministirchu; konni giddonni gobba giddo e’’onni 1 Tiriiliyoone 228.5 biliyoone birra (15.6%) nna pirojektuwate kaa’looshshinni 46.9 biliyoone birra (3.1%) afi’nara dandiinanni yine mixo amandoonni.
416.8 biliyoone baajeetete xe’ne leeltannota qummeesse; baajeetete xe’ne xaaddote baajeete irko liqoonni, pirojektete liqoonna gobba giddo liqoonni diwate mixi’noonnita xawisino.
Xaphooma baajeetete xe’ne giddonni 228.9 biliyoone birri mootimmate asali baatooshshira hosannoha ikkinota qummeesse; filantinoti baajeettete xe’ne xaphooma gobbate giddo laalchinni (GDP) noose qeechi 1% ikkinota huwachishinno.
2017 baajeetete diri xaphooma mootimmate baajeete 1.43 Tiriliyoone ikkitinoti qaangannite.
Qiddist Gezzaheny
Bakkalcho Ella 5, 2017 M.D
