Addis Ababa:- Itophiyu Baaru furcho hooggino doogo lowo geeshsha gaabbissannoe yaanni Xaphoomu ministirchi Abiy Ahimed (Dr) xawisi.
Xaphoomu ministirchi Abiy Ahimed (Dr) EBC ledo assino keeshshonni xawisino garinni; Itophiyu sa’u 30 dirrara Baaru furcho dinose. Kuni ikkino doogo lowo geeshsha gaabbissannoe.
Gaabbisannoe yeemmo woyte mitu mitu sanu abbino ajanda lawannonsa yiinohu xaphoomu ministirchi Abiy (Dr); xaphoomu ministircha ikka’yara albaanni tonnunna 15 diri kawa faajjetenni viidiyotenninna borrotenni noo uurrinshuwa’yaati yiino.
Konni korkaatinni Itophiyu luphiima gawajjo iillitinoseta buuxise; hoogginota Baaru furcho hajo hasaawunni afira noose. Hakku ikka hoogiro gawajjantinonna hiiqqantino gobba sufotenni ge“ino keere abbitanno yee dihedeemmo. Mamooteno ikko mamoote hasaawunni tini hajo tidhama noosetano xawisino.
Itophiyu furcho hoogase barshenna jawa miico iillishinota xawise; Itophiyu aana gumulaminohu dheggetennino ikko wolunni kuni gaabbisannoe; tidhama noosi yee kaajjillunni ammaneemmo yiino.
Xaphoomu ministirchi mussinna laise uyno xawishshinnino mooru Itophiyu giddo kaa`lonte gede mitte hiiqqammenna hunote doogo yineemmohu eemarama hoogiro jireenya buuxisiisate gufichoho yiinohu xaphoomu ministirchi Abiy Ahimed (Dr); moora gargadhate baca usurroommo, baca shorrinoommo, baca manna soorrinoommo; kayinni mittu soorramanno mittu daanno; budu soorrama hoogi geeshsha gargara didandiinanni yiino.
Xaphoomu ministirchi Abiy Ahimed (Dr); loonse daafurre Itophiya soorrineemmo woyteeti qarrinke tidhamannohu yitanno ammana luphiima massagaano deerrinni hala`ladunni hasaawunni qajeelshunni ajuuja beeqqate looso loonsoommo; xibbuunni xibbe mittu mittunku manchi laanfe dinosi yee coyi`ra hoogummorono batinye luphiima massagaano addintanni mooru giddo dino.
Moora mitte jawa hiiqqamme gede anga la”ate gede la`ne gafunni bande loonsanni hee`noommo hajooti. Konnira dagano baxxinohunni mooraano xawo fushshatenninna halama hoogatenni halamaancho ikkanno gede huwachishino.
Shiimunni ammanaminokkihu jawunni diammanamanno. Shiimu aana moora hanafinohu luphi yaanno woyte diuurrisanno yiinohu xaphoomu ministirchi; mooru effi`nannihanna lophote guficho ikkinota daga halante rosiishsha kaajjishshanno woyte lopho dagganni hadhanno yannara manna aaraawisinohu mooru rosichi ajanni; siistemetenni irkisantinno rakkino owaante uynanni daganke fooliishsho afidhanno sani kalaqamanni harannota lowontanni hexxo assi`reemmo yee xawisino.
Abbebech Maatewoos
Bakkalcho Ella 5, 2017 M.D
