Addis Ababa:– Itophiyu 2017 baajeettete dirinni 10 aganna giddo gobbaydi dikkora shiqishshino 354 kume 302 toone buninni 1.8 biliyoone doolaare afi`noonnita bununna shaete biilloonyi egensiisi. Kunino ekispoortete dhaggenni umikkiha luphiima eo ikkinota xawisino.
Biilloonyu loosi mini komunikeeshiinete dayirekiterichi kalaa Sahilemaariyam Gebiremedihin Itophiyu pireesete uurrinshara xawisino garinni; baajeettete dirinni 10 aganna giddo 240 kume 753 toone buna soyaatenni 1.315 biliyoone Ameeriku doolaare eo afirate mixi`ne 354 kume 302 toone gobbaydi dikkora shiqishatenni 1.868 biliyoone Ameeriku doolaare eo afira dandiinoonni. Kunino mixote aleenni borreessiinsoonni gumulsha ikkinota xawisino.
Gumulshu sa“i baajeettete diri tenne yanna ledo heewisiinsiro 869 miliyoone Ameeriku doolaare ale lexxo leellishinota buuxise; gobbate mittu diri ekispoortete dhagge giddo afi`ne egenninoonnikkinna umikkiha ikkino luphiima bunu ekispoorte gumulsha ikkinota coyi`rino.
Baajeettete dirinni 10 aganna giddo sonkoonni buninni 61 kume toone ale Jermene soyaatenni 295 miliyoone Ameeriku doolaare ale eo, 60 kume toone ale Sawudi Arebiya soyaatenni 290 miliyoone Ameeriku doolaare ale hattono 28 kume toone ale Ameerika soyaatenni 192 miliyoone Ameeriku doolaare afira dandiinoonni yiino.
Kuri gobbuwa 1nni 3ki deerri geeshsha amaddino iilluwwa ikkansa buuxisino. Hattono Beljiyeme, Chayinu, Wodiidi Kooriyi, Yunaytid Areb Emreetis, Jaappaane, Xaaliyunna Jordaan kullannire Itophiyu buni iillo gobbuwa ikkitinota xawise; xaphooma eote ragaanni kuri gobbuwa 78 anga xibbuunni gobbaydi soorronni afi`nanniha dibbanno yee coyi`rino.
Sonkoonni bunu danuwa mereerinni; Neqqemt bikkunni 110 toone ale qeecha dibbannota xawise; 464 miliyoone Ameeriku doolaare eo; Sidaamu bikkunni 65 kume toone ale soyaatenni 404 miliyoone Ameeriku doolaare ale eo, Jimmu bikkunni 61 kume toone ale 255 miliyoone Ameeriku doolaare ale eote gumulsha borreessiisatenni 1nni 3 geeshsha eote deerra amaddino yee xawisino.
Baajeettete dirinni 6 qara qara bunu danuwanni xaphooma bikkunni 88 anga xibbuunni gobbaydi dikkora soyaansanna 87 anga xibbuunni eote qeechi noonsata huwachishe; leewu bunu danuwa gumulshi 2016 baajeettete diri tenne yanna ledo eotenni heewisiinsiro baalanti bunu danuwa lexxo leellishansa coyi`rino.
Abbebech Maatewoos
Bakkalcho Onkoleessa 21, 2017 M.D
