Addis Ababa:– Qoqqowu wedelli seeru garinni tantanante mootimma hanaffinota soorrotenna lophote harinsho irkissano gede illachinshe loonsannita Sidaamu Qoqqowi Wedellu Amaale mini egensiisi.
Sa’u muli barrubba giddo uurrinsoonnihu Qoqqowu Wedellu Amaale mini Gambisaanchi wedellichu Yisihaaq Saambure uurrinshankera xawisino garinni; wedellu seeru garinni tantanantenna qinaabbe huuronsa macciishshiishshanni; xa’monsano garunni kayissanni dagoomitte, miinjunna poletiku handaarranni qoossonsa agarantannonna horaameeyye ikkitanno garinni loosate wedellu amaale mini uurrasi jawa dhuka kalaqanno.
Gobbate deerrinni hala’lado dagate kiironni wedellu kiiro batinye ikkase qummeessinohu gambisaanchu; hojjinni assinanni millimillo ikkito sharro guma abbitannokki daafira wedellu tantanante mootimmate waatira ikkatenni mootimma hanafisiissinota soorrote loossa sufisiisa hasiissannota coyi’rino.
Sidaamu qoqqowirano babbaxxitino hedubba noonsa wedella baalante qooxeessubbanni gamba assine gutunni sumuu assitanno hedubba aana hasaawisatenni wedellu hunote assoote gumu’litanno wolquwa ajanda adhitannore ikkitannokki gede assate illachiinshe loonsannitano qummeessino.
Wedellu horonsanna qoossonsa agarsiisi’rate ikko gobbate lophora agarranninsa qeecha fultanno gede gamba assine tantanate hende amaalete mini deerrinni uurrinsoonnitano egensiisino.
Amaalete mini gambisaanchi wedellichu Yisihaaqi yaanno garinni; konni albaannino addi additi wedellu tantano noonkanni. Ikkollana, wedellu gamba yite kaajjite gutu amaale mine diuurrisidhino. Konni kaiminni, mootimma amaddinota gobboomitte soorrotenna lophote hajubba garunni gumulantanno gede wedelluno agarranninsaha qansichimmate qeecha fula hasiissannonsa.
Amadisiiseno, wedellu tantananturo dandoonsa, egennonsanna wolqansa horoonsidhe beeqqaanchimmansa kaajjishi’ratenni uminsara, dagoominsaranna gobbate agarranninsa qeecha fulatenni horaameeyyeno ikka dandiitannota qummeessino.
Qoqqowu Wedellu Amaale mini Soojjaati Sidaami zoone wedellu amaale mini loosu gumulsiisaanchi Wondaachew Wolde isi widoonni; amaalete mini uurrasinni wedellunniha miinju, dagoomittetenna poletiku dhuka kalaqa dandiinannita coyi’rino.
Wedellu gobbate giddo babbaxxitino latishshu loossara noonsa qeechi luphiima ikkasi kule; gobbate miinju, dagoomittetena poletiku handaarrara jawa hale ikkansanni woyyaabbinota laooshshu soorro abbitanno garinni loosa agarrannita huwachishino.
Bizuneh Birhaanu
Bakkalcho Onkoleessa 21, 2017 M.D
