Addis Abeba:– Itophiyu Baaru furcho xa’mo hala’lado dagate irko nooseta ikkasenni keerunna dippilomaasete doogonni dawaro afidhanno gede loonsanni hee’noonnita gobbayidi hajo inistituute qaru dayirekterchi Jaafir Bediru xawisino.
Kunino duumu baarinna Edeni baaru hulfamanno qooxeessira irkisama bowirsa, gutu sumimme kalaqa, keere, hobbaatenna jireenya lossate illachishinoho.
Gobbayidi hajo inistituute qaru dayirekterchi Jaafir Bediruhu 3ki duumu baarinna Edeni baaru gaameeni qooxeessi amaalammete ba’re Addis Ababaho harinsi yannara coyi’ranni; Itophiyu Abbayi laginna duumu baari istiraateejikete hajubbase assite la’anno. Itophiyu baaru furcho xa’mo hala’lado dagate irko nooseta ikkasenni keerunna dippilomaasete doogonni dawaro afidhanno gede loossanni afantanno yiino.
Abbayinna duumu baari dippilomaasetenna gutu sumimme base ikkinnina kiphote kora ikka dinonsa yiinohu qaru dayirekterchi; Itophiyu baaru furcho xa’mo dippilomaasetenna bayirreenya ayirrissinota ikkase coyi’rino. Danna tayissanno bidhatto, tidhantinokki kiphonna luphiima biilloonyu hasatto sharre duumu baarinna Edeni baaru gaameenna qooxeessi hekko ikkansa qumeesse; Itophiyu baaru furcho xa’mo hala’lado dagate irkonna sumimme afidhino gobbate yawooti yiino.
Amaalammete ba’reno miinju halamme kaajjishate, baaru aani mulqiraano labbeemmere yaachishshanno hajubba tirate kaa’litannota xawisino.
Itophiyu qooxeessu keerenna hobbaate agarsiisate gutu horonsiraanchimma buuxisate widoonni qooxeessu gobbuwa ledo halante loossanni afantannota xawisino.
Itophiyu gobbayidi hajo nistituute faranjootu 2030 nni qajeelshunna xiinxallotenni Ahigurete massagaancho ikkate loossanni afantanno. Kunino illetenni leeltino xiinxallo assa, gobbayidi poolise beeqqaano ikkadda assanna dippilomaasetenni, keerunna kalqoomu halammenni fullankete mereersha ikka hanqaffe amaddinota ikkase coyi’rino.
Gargarooshshu, rosunna qajeelshu qaru biddishshi sooreessi leetenaal Jeneraal Yimer Mekkonninihu isi widoonni; Itophiyu duumu baarinna Edeni baaru gaameena qooxeessira noota mudditino hajo tirate dandiisannoha kaajjado xaadooshshe kalaqqanni afantanno yiino.
Itophiyu duumu baari hobbaate agarsiisate widoonni baaru aani mulqira lendanna wolootta seerimale assootubba gargarate hee’rannose qeechi jawa ikkasi qummeessino. Tenne halammehu qaru illachi olu uduunni doyicho, cancishaanchimmanna seerrimale woxu millimmo labbeemmere gutu bidhatto gargarate dandiissannota xawise; Itophiyu baaru gaameeninna duumu baari gobbuwa ledo noose xaadooshshi dippilomaasenniha calla ikkikkinni gutu hixinni mittoo’minoha ikkinota coyi’rino.
Itophiyu Afriku gobbuwanna baaru gaameeni gobbuwa ledo anga amadante qoxeessaho keere, latishshanna jireenya halashshate jawaatte loossanni afantannota xawise; qooxeessu hembeelamatenni fule jireenyu buusa ikkanno gede, kiphamantenni hasaawunna mittimma kalaqannoha ikkanno gede wo’manka woyte woyyaawinoha doora hasiissannota huwachishino.
Qiddist Gezzaheny
Bakkalcho Onkoleessa 21, 2017 M.D
